Türkiyə çempionatında 28-31 mart tarixində keçiriləcək 29-cu turun oyunlarının hakim təyinatları rəsmən açıqlanıb.

''Football-plus.az'' xəbər verir ki, bu dəfəki təyinatlar böyük maraqla gözlənilirdi. Axı bu tur ''Beşiktaş'' - ''Qalatasaray'' derbisi var.

''Qartal''ın böyük israrına baxmayaraq federasiya derbiyə əcnəbi hakim təyin etməyib. Türkiyə mətbuatının bu məsələdəki iddiası doğru çıxdı. Amma türkiyəli həmkarlarımız hakimin kimliyini çox da doğru müəyyənləşdirə bilməyiblər. Əsas namizədlər Mehmet Türkmən, Cihan Aydın və Atilla Karaoğlan hesab olunurdu. Amma derbiyə sürpriz şəkildə Yasin Kol təyinat alıb!

Əslən Trabzondan olan 37 yaşlı bu hakimin heç FİFA referisi statusu da yoxdu. İddialara görə o heç ingilis dilini də bilmir. Kol yalnız 2020/21 mövsümündən etibarən Türkiyə çempionatının oyunlarına əsas hakim qismində təyinat almağa başlayıb. Maraqlıdı ki, ötən il federasiyanın qərarı ilə Yasin Kolun səviyyəsi aşağı endirilmiş və o, bir müddət yalnız aşağı liqa matçlarına təyinat almışdı. Bu mövsüm Kol 13-ü superliqa, 7-si 1-ci liqa və 2-si ölkə kubokunda olmaqla 22 oyun idarə edib.

TFF-nin belə vacib məqamda çempionluq yarışında böyük önəm kəsb edən bir qarşılaşmaya derbi təcrübəsi olmayan bir hakimi göndərməsi çox qəribədi. Yasin Kol bu günə qədər nəhənglərin öz aralarında keçirdikləri heç bir oyuna təyinat almayıb. Amma onun ''Beşiktaş'' və ''Qalatasaray''la bağlı göstəricilərinə nəzər salmaq yerinə düşər. ''Ağ-qaralar'' bu hakimlə indiyə qədər 5 oyundan 2 qələbə, 2 heç-heçə, 1 məğlubiyyət, ''sarı-qırmızılar'' isə 2 oyundan 1 qələbə, 1 heç-heçə ilə ayrılıblar.

Gözlənildiyi kimi ''Beşiktaş'' cəbhəsi bu təyinata çox sərt reaksiya verib. Prezident Sərdar Adalı TFF-ni ''Fənərbaxça'' ilə ''Qalatasaray''ın oyuncağı adlandıraraq qurumun prezidenti İbrahim Hacıosmanoğlunun, eləcə də idarə heyətində yer alan bütün yönəticilərin istefasını tələb edib. Adalıdan öncə qısa müddət prezident vəzifəsini icra etmiş Hüseyin Yücəl isə ''Beşiktaş''a qarşıdakı derbidə meydana çıxmamağı məsləhət görüb. .

Xatırladaq ki, bu gün günorta saatlarında TFF-nin başqan vəkili və idarə heyətinin üzvü Ceyhun Kazancı məhz derbinin hakim təyinatına etiraz əlaməti olaraq istefa vermişdi.