''Beşiktaş'' da əcnəbi hakim tələb etdi!
''Qalatasaray'' ilə ''Fənərbaxça'' arasındakı son derbini Slavko Vinçiçin idarə etməsinin ardından diqqətçəkən bir hadisə yaşanıb.
''Football-plus.az'' az xəbər verir ki, artıq ''Beşiktaş'' da öz derbilərinin əcnəbi hakim tərəfindən idarə edilməsini istəyir. ''Qartal'' ''Qalatasaray'' və ''Fənərbaxça''ya qarşı oyunların əcnəbi hakimə tapşırılması üçün Türkiyə Futbol Federasiyasına rəsmi müraciət ünvanlayıb.
Deyilənə görə bu məsələ tək ''ağ-qaralar''la məhdudlaşmayacaq. Elə ''Trabzonspor''un da federasiyaya müraciət etməyə hazırlaşdığı iddia edilir. Əslində bunu gözləmək olardı. ''Beşiktaş'' prezidenti Sərdar Adalı ötən həftəsonu ''Eyüpspor''a qarşı keçirdikləri matçın ardından bunları demişdi:
''Federasiya prezidentinin hakimlərlə bağlı son açıqlamasını incələmək vaxtım olmadı. Bu günə qədər hakimlərə görə çox canımız yansa da, yerli hakimlərə güvəndiyimizi dilə gətirirdik. Ancaq yeni bir qərarla ''Qalatasaray'' - ''Fənərbaxça'' oyununa əcnəbi hakim təyin olundu. Elədisə, biz də ''Qalatasaray'' və ''Fənərbaxça''ya qarşı oyunlarımıza eyni hakimi tələb edirik. Yəni federasiya indidən bizim müraciətimizə hazır olsun. Artıq bu qapı açıldı. Bizim də əsas oyunlara əcnəbi tələb etmək haqqımız var. Ancaq bu qapının açılması heç də gözəl olmadı''.
Qeyd edək ki, ''Beşiktaş'' ''Qalatasaray''la martın 30-da evdə, ''Fənərbaxça'' ilə mayın 4-də səfərdə qarşılaşacaq.
ƏLİ
