Bu həftə Türkiyə çempionatında derbi həftəsidi.

''Football-plus.az'' xəbər verir ki, 29-cu turda ''Beşiktaş'' ''Qalatasaray''ı qəbul edəcək. Bu mövsüm artıq fanatları önündə ''Fənərbaxça''nı məğlub edən (1:0) ''Qartal'' çempionluğa digər namizədi də evə əliboş yola salmaq arzusundadı.

İlk baxışdan düşünmək olar ki, bu, Okan Buruk ile Ole Qunnar Sulşerin məşqçi kimi yolları ilk dəfə kəsişəcək. Çünki norveçli mütəxəssis cəmi 2 ay öncə Türkiyəyə gəlib və bu, onun ilk İstanbul derbisi olacaq. Amma heç də belə deyil. Bu məşqçilərin yolu daha öncə kəsişib. Özü də tamam başqa klubların başında.

Məlum olduğu kimi Okan Buruk 2019/20-da ''İstanbul BŞ'' ilə çempionluq yaşayaraq tarixi bir uğura imza atmışdı. Növbəti mövsüm başakşəhərlilər məhz bu uğur sayəsində Türkiyəni Çempionlar Liqasının qrup mərhələsində təmsil etmək hüququ qazanmışdılar. Bu iki məşqçinin yolu da məhz həmin ÇL-də kəsişib. O vaxt ''İstanbul BŞ'' PSJ, ''Leyptsiq'' və Sulşerin çalışdırdığı ''Mançester Yunayted'' ilə eyni qrupa düşmüşdü. Türkiyə çempionu həmin turnirin qrupunu 1 qələbə, 5 məğlubiyyətlə tamamlamışdı.

Maraqlıdı ki, Buruk yeganə qələbəsini məhz Sulşerin ''Yunayted''i ilə ev oyununda əldə etmişdi. 2020-ci ilin noyabrın 4-də Fatih Terimin adını daşıyan stadionda İstanbul təmsilçisi Demba Ba və Edin Visçanın qolları ilə 2:1 üstün olmuşdu. Amma 3 həftə sonra ''Old Trafford''da ''Yunayted'' 4:1 qalib gələrək qisasını artıqlaması ilə almışdı. Yəni bu məşqçilərin duelində hesab 1:1-di. Hər məşqçi öz meydanında qalib gəlib və səfərdə uduzub.