Okan Buruk, deyəsən, “Qalatasaray”a klub tarixinin rekordlarını alt-üst etmək üçün gəlib.

Oktyabrın sonlarından bəri qabağına çıxanı məğlub edən “Qalatasaray” “Girəsunspor”u yenməklə rəsmi matçlarda ardıcıl 13-cü, superliqada isə 10-cu qələbəsini qazandı. Düzdü, 1959-dan bəri “Cim-Bom”un tarixini ələk-vələk eləsək, görərik ki, hər iki göstərici daha öncə yaşanıb. Amma belə desək, calaq yolu ilə. Yəni bir mövsümün sonu ilə o biri mövsümün əvvəlini birləşdirmək üsulu ilə. Məsələn, Mustafa Dənizlinin birinci dönəminə nəzər salsaq, 1987/88-in sonunda və 1988/89-un əvvəlində komanda rəsmi oyunlarda ardıcıl 13 qələbə qazanıb (bunların 12-si çempionatda qeydə alınıb). Və ya Fatih Terimin birinci dönəmində “Qalatasaray” 1997/98-in son 5 turu və 1998/99-un ilk 5 turu olmaqla çempionatda ardıcıl 10 qələbə qazanıb. Amma Okan Burukun göstəricisini özəl edən məqam edi ki, bu qələbələr bir mövsümün gedişində əldə olunub! Bu baxımdan 49 yaşlı mütəxəssis adını klubun şanlı tarixinə yeni rekordçu kimi yazdırdı.