Fevralın 24-də Türkiyə çempionatının 25-ci turunda baş tutacaq ''Qalatasaray'' - ''Fənərbaxça'' oyununun hakimi ilə bağlı bəzi detallar bəlli olub.

''Football-plus.az'' xəbər verir ki, böyük səbirsizliklə gözlənilən derbiyə əcnəbi hakimin təyinat alması gündəmdə idi. Amma derbinin yerli hakimin idarə edəcəyi dəqiqləşib. Bunu Türkiyə Futbol Federasiyasının idarə heyətinin üzvü Ural Aküzüm açıqlayıb. O, ''Ekol TV''yə açıqlamasında bildirib ki, bu mövsümün sonuna qədər bütün oyunlarda əsas hakimlər yalnız yerli olacaq. Əslində hər iki klubun razılığı olsaydı, bu taleyüklü oyun əcnəbiyə tapşırılacaqdı. Amma Türkiyə mətbuatının yazdığına inansaq, ''Fənərbaxça'' cəbhəsi əcnəbi hakim istədiyi halda ''Qalatasaray'' yerli hakimdə israr edib.

Ona görə də TFF bu oyun üçün istisna etməmək qərarına gəlib. Daha bir məqam ondan ibarətdi ki, böyük ehtimalla Xəlil Umut Meler derbiyə təyinat almayacaq. Halbuki yerlilərdən əsas namizəd məhz o hesab olunurdu. Amma Melerin Çempionlar Liqasında ən son idarə etdiyi ''Brügge'' - ''Atalanta'' oyununda verdiyi penalti qərarı böyük söz-söhbətlərə səbəb oldu. Ona görə də TFF digər variantlara yönəlməli olub.

Hələ ki, mövsümün şah oyununu idarə etməyə əsas namizəd Mehmet Türkmən ilə Atilla Karaoğlandı. 38 yaşlı Karaoğlan bu mövsümün ilk dövrəsindəki derbidə də fit sahibi olmuş və ciddi səhvə yol verməmişdi. Həmin qarşılaşmada ''Qalatasaray'' səfərdə 3:1 üstün olmuşdu.

ƏLİ