Zaman daralır və Türkiyə çempionatının 25-ci turu yaxınlaşır. Avrokubok matçlarının ardından həftəsonu superliqada növbəti tur keçiriləcək.

Məhz həmin turda çempionluğa əsas namizədlər - ''Qalatasaray''la ''Fənərbaxça''nın dueli baş tutacaq. Derbi bazar ertəsi keçiriləcək.

Maraqlıdı ki, oyuna 6 gündən də az vaxt qalmasına baxmayaraq Türkiyə Futbol Federasiyası hələ də derbiyə yerli, yoxsa əcnəbi hakimin təyin olunması ilə bağlı qərarını verməyib. Düzdü, bir müddət öncə federasiyanın idarə heyətinin üzvü Ural Aküzüm derbi də daxil olmaqla mövsümün qalan hissəsində bütün oyunlara yerli hakimlərin təyinat alacağını demişdi. Amma hadisələrin sonrakı axarı göstərdi ki, bu, bir qədər tələsik açıqlamadı.

Bazar ertəsi federasiya bununla bağlı rəsmi bəyanat yayaraq hər iki klubun rəhbərliyini görüşə dəvət etdi. Görüş çərşənbə axşamı ''Fənər''in prezidenti Əli Koç, ''Qalatasaray'' prezidenti Dursun Özbək və federasiya prezidenti İbrahim Hacıosmanoğlunun iştirakı ilə baş tutmalı idi.

Təbii ki, əsas gündəm mövzusu hakim məsələsi olacaqdı. Amma Özbək federasiyanın dəvətini ''gözdən pərdə asmaq üçün atılmış addım'' adlandıraraq toplantıya qatılmaqdan imtina etdi! Belə güman olunurdu ki, hər iki tərəfdən rəsmi tələb gələcəyi təqdirdə federasiya əcnəbi hakim məsələsini gündəminə alacaqdı. Amma bu tələb yalnız ''Fənərbaxça'' tərəfindən gəlib.

''Qalatasaray'' əcnəbi hakim ideyasını dəstəkləmir. Dursun Özbəkin federasiyanın görüş dəvətini geri çevirməsi də bunu bir daha sübut etdi. Bununla belə hələ də məsələ açıq qalır və bəzi mənbələr, şərhçilər federasiyanın əcnəbi hakimin dəvət olunması mövzusu üzərində baş sındırdığını iddia edirlər.

Qeyd edək ki, derbinin hakimi cümə axşamı açıqlanacaq.

ƏLİ