Misli premyer-liqasında 3-cü dövrənin sonuna gəldik.

Yığmaların yoldaşlıq görüşlərinə görə yaranan ikihəftəlik fasilə tam yerinə düşdü. İndi hər komandanın əlinə nəfəsini dərmək, həlledici dövrə ərəfəsində gücünü yenidən qiymətləndirmək və turnir strategiyasını qətiləşdirmək üçün yaxşı fürsət düşüb. Fasilə ərəfəsindəki son tur avrokuboklara iddialı bütün komandaların (“Neftçi”nin iddiası əsasən kubokla bağlıdı deyə, bu siyahıya aid etmirik) xal itirməsi və meydan sahiblərinin qələbəyə həsrət qalması ilə əlamətdar oldu.

Tur Mərdəkanda keçirilən “Araz-Naxçıvan” – “Şamaxı” matçı ilə start götürdü. Bu iki komandanın mübarizəsində heç biri üstünlüyə yiyələnə bilmədi. Komandalar daha çox uduzmamağın qayğısına qaldı. “Şirlər”i yenə hardasa anlamaq olar. “Qırmızı-ağlar” isə artıq 7 turdu qələbəyə həsrətdi. Əvvəlki dövrələrdə toplanan xal ehtiyatı sona qədər işə yarayacaqmı? Bu suala cavab vermək çətindi. Yəqin elə Elmar Baxşıyev üçün də.

“Qarabağ” adətən hücuma həvəs göstərsə də, “Kəpəz”in sıx müdafiəsi rəqibin variantlarını əgəllədi. Ötən tur “Sumqayıt” önündə darmadağın olan “sarı-göylər” Ağdam klubu ilə heç-heçə etdi. Qurban Qurbanov heç-heçəni daha çox qazonun durumu ilə izah etsə də, futbolçularının qeyri-dəqiqliyi üzərində də düşünməlidi.

Şənbənin ikinci oyununda - Masazırda komandalar hərəyə 1 xal qazandı. “Sabah” ilk hücumu qola çevirməyi bacardı. Lakin “Zirə” də yaxşı qurulan müdafiə və sürətli hücumlarla heç-heçəyə layiq idi. “Bayquşlar” 5 turdu qələbə qazana bilmir. “Zirə”nin qələbə seriyası isə 4-də dayandı. Əsas izləyicilərindən “Araz-Naxçıvan”la “Turan Tovuz”un da büdrədiyini nəzərə alsaq, əslində “qartallar” hesabat turunda heç nə itirmədi. Onlar indi naxçıvanlılardan 5, tovuzlulardan isə 9 xal irəlidədi.

Nəhayət, turun 4-cü matçında qalibi müəyyənləşdirmək mümkün oldu. İlk 30 dəqiqədə “Səbail”in qapısına iki dəfə yol tapmağı bacaran “Neftçi” məntiqlə asan qələbə qazanmalıydı. Ancaq Rüfət Abdullazadənin hissənin sonlarında vurduğu gözəl qol “ağ-qaralar”ın bütün planlarını pozdu, onları təlaşa saldı. Bu məğlubiyyət Cavid Hüseynovun “Səbail”lə yolları ayırması ilə nəticələndi. Artıq əminliklə demək olar ki, məhz “Səbail” elitadan getməyə əsas namizəddi. Mövsümün gedişində əvvəlcə Şahin Diniyevi, ardından Cavid Hüseynovu yola salan “dənizçilər”i yalnız möcüzə xilas edə bilər. O möcüzə “sükan arxasına” keçən Elvin Məmmədovun simasında təcəlla edəcəksə, biz buna yalnız şlyapamızı çıxara bilərik!

Hə, bu gün ağır vəziyyətdə olan komandalardan biri də “Turan Tovuz”du. Yox, turnir cədvəli baxımından qorxulu heç nə yoxdu. Sadəcə, evdə “Sumqayıt”a uduzan komandanın baş məşqçisi Kurban Berdıyev açıq-aşkar işləri yoluna qoya bilmir. Oyundan sonra sosial şəbəkələrə axın edən tovuzlu tərəfdarlar da baş məşqçinin istefasını tələb etdi. “Bozqurd” ardıcıl 3-cü oyunda qələbəyə həsrət qalmaqla avrokuboklara vəsiqə şansını xeyli azaltdı. Vaqif Cavadov və sumqayıtlı azarkeşlər isə artıq rahat nəfəs ala bilər – sonuncu pillədəki “Səbail”lə arada 10 xal fərqi var.

Misli premyer-liqası
3-cü dövrə, 27-ci tur
14 mart
Araz-Naxçıvan – Şamaxı 1:1
15 mart
Kəpəz – Qarabağ 0:0
Sabah – Zirə 1:1
16 mart
Səbail – Neftçi 1:2
Turan Tovuz – Sumqayıt 1:2

1. Qarabağ 27 20 4 3 65-16 64
2. Zirə 27 16 4 7 44-22 52
3. Araz-Naxçıvan 27 13 8 6 27-22 47
4. Turan Tovuz 27 11 10 6 34-29 43
5. Sabah 27 7 14 6 36-34 35
6. Neftçi 27 7 10 10 25-35 31
7. Sumqayıt 27 8 4 15 20-36 28
8. Şamaxı 27 7 7 13 25-32 28
9. Kəpəz 27 6 5 16 22-52 23
10. Səbail 27 4 6 17 21-41 18

Bombardirlər: Leandro Andrade (Qarabağ) – 11, Cesse Sekidika (Sabah) – 10, Felipe Santos (Araz-Naxçıvan), Davit Volkov (Zirə) – 9.

Növbəti turun oyunları martın 28-30-u aralığında keçiriləcək: “Turan Tovuz” – “Qarabağ”, “Neftçi” – “Araz-Naxçıvan”, “Sumqayıt” – “Sabah”, “Kəpəz” – “Səbail”, “Zirə” – “Şamaxı”.

Yeri gəlmişkən...
Cari mövsümdə 6-cı baş məşqçi istefası gerçəkləşdi. Cavid Hüseynov rəhbərliyin qərarı ilə istefaya göndərilən 5-ci mütəxəssisdi. Ona qədər “Sabah” Krunoslav Renduliçi, “Neftçi” Roman Qriqorçuku, “Kəpəz” Adil Şükürovu, “Səbail” Şahin Diniyevi yola salıb. Samir Abasov isə “Sumqayıt”dan öz istəyi ilə ayrılaraq “Neftçi”ni çalışdırmağa başlayıb.

ƏSƏD SEYİDOV