Misli premyer-liqasının 14-cü turu “Qarabağ”la “Araz-Naxçıvan”dan başqa bütün iddialı komandaların xal itirməsi ilə yadda qaldı.

Hətta “Sabah”ın Tovuzda qələbə qazana bilməməsi Krunoslav Renduliçə baha başa gəldi. “Bayquşlar”ın ardıcıl 7-ci oyunda qələbə həsrət qalması xorvatiyalı mütəxəssisin qovulmasıyla nəticələndi. Yeri gəlmişkən, bu, cari mövsümdəki 5-ci məşqçi istefası oldu. Cavid Hüseynovun baş məşqçi kimi debütünü də qeyd etməyə dəyər.

Tur Tovuzda keçirilən “Kəpəz” – “Araz-Naxçıvan” oyunu ilə start götürüldü. “Qırmızı-ağlar” inamlı qələbə sayəsində birgünlüyə olsa da, zirvəyə yüksəldi. Məğlubiyyətsiz oyunlar seriyasını 13-ə çatdıran Naxçıvan klubuna artıq daha ciddi yanaşmağa dəyər. “Kəpəz” isə sabit nəticə göstərmək baxımından hələ çox çalışmalıdı. Mümkün qələbə gəncəliləri turnir cədvəlində “Səbail”dən irəli atacaqdı. “Kəpəz” 2-ci hissədə oyunun axarını dəyişmək üçün çox çalışsa da, bunu bacarmadı. Kapitan Xvalkonun kobud səhvini görəndən sonra bu komandanın elitada yerini qoruyacağına inam daha da azalır.

Şahin Diniyev getdi, Cavid Hüseynov gəldi və “Səbail” yenə darmadağından qurtula bilmədi. Əslində rəqibin “Qarabağ” olması yeni baş məşqçi üçün heç də yaxşı əlamət deyildi. Meydana optimal heyətlə çıxan ağdamlılar “Lion”la oyunun baş məşqini edirdi. Hesabı nəzərə alsaq, hər şey çempion üçün yaxşı alındı, indi artıq Fransa təmsilçisi ilə oyunu həvəslə gözləməyə dəyər.

Samir Abasov baş məşqçi postunu tutandan sonra “Neftçi”nin oyunundakı hansısa keyfiyyət dəyişikliyindən danışmaq çətindi. Sadəcə, nəticələr bir qədər yaxşılaşıb, komandanın özünəinamı artıb. “Ağ-qaralar” bu mütəxəssislə 2-ci qələbəsini qazansa da, hələ də “avrokubok zonası”ndan çox uzaqdı. “Zirə” isə autsayderlərdən birinə məğlub olmaqla eniş dövrünü yaşadığını təsdiqlədi. Yeni mövsümə yaxşı başlayan Rəşad Sadıqovun komandası ardıcıl üç turdu xal itirir. “Neftçi” bu qələbə hesabına “Şamaxı” ilə aradakı xal fərqini “əritdi”.
“Turan Tovuz” – “Sabah” oyunu da maraq doğururdu. Ən azı ona görə ki, hər biri avrokuboklara vəsiqəyə iddialıdı, hər birini əcnəbi mütəxəssis çalışdırır. Bərabərlik onlardan birinin vəzifəsini itirməsiylə nəticələndi. “Sabah” rəhbərliyi Krunoslav Renduliçlə yolları ayırdı. “Bayquşlar”a nə oldusa, “Makkabi” ilə səfər oyunundan sonra oldu. Onlar bir daha həmin səviyyəyə qalxa bilmədi. Renduliçdən fərqli Kurban Berdıyevin etimad limiti hələ tükənməyib. “Turan Tovuz” rəhbərliyi ardıcıl xal itkilərinə dözür. Amma nə vaxta qədər?!

Turdan qazanclı çıxan klublardan biri də “Sumqayıt”dı. Vaqif Cavadov gələndən sonra 3-cü qələbəsini qazanan “kimyaçılar” 6-cı pillədə qərarlaşıb. Özü də bu qələbə şəhərin 75 illik yubiley tədbirlərinə təsadüf etdiyinə görə daha dəyərlidi. “Şamaxı” isə 7 turdu qələbə qazana bilmir. Artıq Ayxan Abbasovun komandasının gücü tükənib. “Şirlər” mövsümdəki ən zəif oyunlarından birini keçirdi. Cavadov sanki yaradıcılıq axtarışları aparır, yeni komanda formalaşdırmağa çalışır. Onun nə dərəcədə uğurlu olacağını komandalar qış fasiləsinə yollananda görəcəyik.

Misli premyer-liqası
2-ci dövrə, 14-cü tur
22 noyabr
Kəpəz - Araz-Naxçıvan 0:2
23 noyabr
Səbail – Qarabağ 0:3
Neftçi – Zirə 2:1
24 noyabr
Turan Tovuz – Sabah 1:1
Sumqayıt – Şamaxı 2:1

ƏSƏD SEYİDOV