Misli premyer-liqasının 28-ci turu ilklə əlamətdar oldu. Ölkə çempionatı tarixində ilk dəfə sona 8 tur qalmış qızıl medalların sahibi bilindi. Bu, Qurban Qurbanovun çalışdırdığı “Qarabağ”dı. Qalan oyunlara gəlincə, ilk “4-lük”də yenə yerdəyişmələr oldu. “Sabah” burdakı yerini “Sumqayıt”a verdi, “Neftçi” ilə “Zirə” bir pillə irəlilədi.

Turun ilk oyununda “Qəbələ” “Neftçi”ni qəbul etdi. “Qırmızı-qaralar” 1 xal da qazana bilmədi. Nəticənin ədalətli olmadığını deməliyik. Çünki meydanda can qoyan, daim hücuma can atan “qırmızı-qaralar” idisə, əlinə düşən nadir şanslardan birini dəyərləndirən “Neftçi” sona qədər də qələbə hesabını qorumağı bacardı. Miodraq Bojoviçin komandası yenidən turnir cədvəlinin 2-ci pilləsinə yüksəldi. Yeri gəlmişkən, monteneqrolu mütəxəssis bəxtlərinin gətirdiyini də gizlətmədi. Beləcə “Qəbələ” izlədiyi “Kəpəz”lə aradakı xal fərqini azalda bilmədi. Baxmayaraq ki, “sarı-göylər”in də bu tur uduzacağı məlum idi.

“Kəpəz” – “Qarabağ” görüşü nominal meydan sahiblərinin darmadağını ilə bitdi. “Köhlən atlar” tarixindəki 11-ci çempionluğa nail oldu. Həm də çempionatın bitməsinə 8 tur qalmış! Təbii ki, bu göstərici çempionatdakı rəqabətin nə yerdə olduğunu xəbər verir. Bu oyuna rəng qatan məqamlardan biri də “Kəpəz”in baş məşqçisi Adil Şükürovun fikirləridi. Onun “Azərbaycan klubarı "Qarabağ"la qarşılaşanda sanki rəqibi qoruyur” deməsi birmənalı qarşılanmadı.

“Səbail” – “Turan Tovuz” görüşünün özünəməxsus bir cəhəti var. Belə ki, hər iki komandanın çalışdırıcısı, adətən, oyunlarda qazanılan nəticədən razılığını dilə gətirir. Bu mənada yenə eyni durumun şahidi olduq. Şahin Diniyev 1 xalın qızıla bərabər olduğunu, eyni zamanda, nəticənin ədalətli olduğunu dedi. Ayxan Abbasov isə şanslardan kifayət qədər istifadə edə bilmədiklərini söylədi. Hər halda, 1:1 ədalətli nəticədi.

“Sabah” – “Zirə” oyunu meydan sahiblərinin xorvatiyalı baş məşqçisi Krunoslav Renduliçin ilk məğlubiyyəti ilə yadda qaldı. Bununla da “tələbələr” ikinci pillədən uzaq düşdü. Bu oyunda hansısa gərgin mübarizədən, qarşılıqlı hücumlardan danışmaq yersizdi. Oyunu tribunadan və ekran arxasından izləyən futbolsevərləri əsnəmək tuturdu. Yeganə qol da standart vəziyyətdən sonra vuruldu. Belə baxımsız oyunla stadiona azarkeş cəlb etmək çox çətindi.
“Sumqayıt” – “Araz-Naxçıvan” qarşılaşması turun sonuncu oyunun oldu. Sumqayıt təmsilçisi qalib gələrək, turnir cədvəlində dördüncü sıraya yüksəldi. Muxtar Respublika təmsilçisi isə ardıcıl 6 oyundu qələbəyə həsrətdi. Matçın taleyini penaltidən vurulan yeganə qol həll etdi. Epizoda gəlincə, baş hakim Kamranbəy Rəhimovun hansı mülahizə əsasında “nöqtə”ni göstərməsi böyük maraq doğurur. Bu oyunda qarşılıqlı mübarizənin və hücumların şahidi olduq. Fəqət oyunun taleyini belə şübhəli penaltinin həll etməsi ədalətli deyil. Bəlkə də “Sumqayıt” qələbəyə layiq idi. Amma belə penaltiylə yox!

Misli premyer-liqası
3-cü dövrə, 28-ci tur
29 mart
Qəbələ – Neftçi 0:1
Kəpəz – Qarabağ 1:6

30 mart
Səbail – Turan Tovuz 1:1
Sabah – Zirə 0:1

31 mart
Sumqayıt – Araz-Naxçıvan 1:0

1. Qarabağ 28 22 3 3 77-24 69
2. Neftçi 28 12 7 9 35-29 43
3. Zirə 28 11 9 8 22-18 42
4. Sumqayıt 28 11 9 8 27-32 42
5. Sabah 28 11 7 10 39-33 40
6. Səbail 28 10 8 10 40-42 38
7. Turan Tovuz 28 9 9 10 42-39 36
8. Araz-Naxçıvan 28 8 8 12 27-37 32
9. Kəpəz 28 7 6 15 30-53 27
10. Qəbələ 28 4 4 20 20-52 16

Bombardirlər: Olavio Juninyo (Qarabağ) – 17, Aleksandr Ramalinqom (Səbail) – 11.

Növbəti turun proqramı
5 aprel, 20.00. Araz-Naxçıvan – Kəpəz
6 aprel, 16.00. Turan Tovuz – Sabah
6 aprel, 20.00. Qarabağ – Səbail
7 aprel, 16.30. Zirə - Qəbələ
7 aprel, 20.00. Neftçi – Sumqayıt

KAMAL SƏFƏR