DÇ-2026-nın seçmə mərhələsinin Cənubi Amerika zonasında 14-cü turun oyunları keçirildi.

''Football-plus.az'' xəbər verir ki, bütün diqqətlər bu zonanın şah oyununa - Argentina - Braziliya duelinə yönəlmişdi.

Əslində son dünya çempionu statusunda olan Argentina bu qarşılaşmadan öncə mundiala vəsiqəni rəsmiləşdirdi. Belə ki, Boliviya - Peru (0:0) oyunundan sonra ''albiselesta''nın seçmə mərhələni ilk ''6-lıq''da bitirəcəyi dəqiqləşdi.

Bundan başqa prinsipial rəqibi 2019-dan bu yana məğlub edə bilməyən Braziliya çox istəkli idi. Hər halda oyunçuların oyunöncəsi açıqlamalarından bunu hiss etmək mümkün idi. Xüsusilə Rafinya fərqlənirdi. O, qarşılaşmadan öncə əfsanəvi Romarioya verdiyi müsahibədə Argentinanı asanlıqla yenəcəklərini bildirmişdi. Amma Braziliya nəinki qalib gələ bilmədi, hətta son illərin ən üzücü məğlubiyyətinə düçar oldu. Fanatlar ilk 37 dəqiqədə 4 qol gördülər. Bunlardan 3-ü meydan sahibləri tərəfindən vuruldu.

Alvares, Fernandes və Mak Allisterin qollarına ikinci hissədə Dieqo Simeonenin oğlu Culianonun da qolu əlavə olundu. Braziliyanın heyətində isə yeganə qolu Kunya vurdu. İddialı açıqlamalara baxmayaraq Vinisius, Rodriqo və Rafinya kimi ulduzlar bu oyunda heçnə edə bilmədilər. Argentinanın 4:1-lik qələbəsi ilə bitən oyunda bir sıra maraqlı və tarixi faktlar qeydə alındı. Argentinanın Braziliyaya qarşı məğlubiyyətsiz seriyası 5 oyuna yüksəldi (4 qələbə, 1 heç-heçə).

Daha öncə komandanın bu rəqibə qarşı ən azı 5 oyunluq məğlubiyyətsiz seriyası 2 dəfə (1923-39, 1990-93) olmuşdu. Argentina Cənubi Amerika zonasında bir seçmə mərhələnin gedişində Braziliyanı hər iki oyunda məğlub edən ilk komanda kimi adını tarixə yazdırdı. 2023-ün noyabrında keçirilən ilk görüşdə Argentina səfərdə minimal hesabla üstün olmuşdu.

Argentina Braziliyanı 1964-dən bu yana ilk dəfə darmadağın etdisə, 1959-dan bu yana ilk dəfə bu rəqibə 4 qol vurdu! Braziliya isə DÇ-2014-də Almaniya ilə oyunda qeydə alınan faciəvi 1:7-dən bu yana ilk dəfə rəsmi oyunda 4 top buraxdı. Argentina ardıcıl 14-cü dəfə mundiala vəsiqə qazandı.

Komandanın tarixində iştirak etmədiyi yeganə turnir DÇ-1970-di. Onu da bildirək ki, artıq DÇ-2026-nın 7 iştirakçısı bəllidi.

Meydan sahibləri ABŞ, Kanada və Meksika ilə yanaşı, Asiya zonasından Yaponiya ilə İran, Okeaniya zonasından Yeni Zelandiya, Cənubi Amerika zonasından isə Argentina vəsiqəni təmin edib.