Son olaraq Türkiyə təmsilçisi ''Antalyaspor''u çalışdıran Aleks de Souzadan yeni və sürpriz bir xəbər var.

''Football-plus.az'' xəbər verir ki, ötənlərin məşhur futbolçusu məşqçi karyerasını erkən bitirmək qərarına gəlib.

Belə ki, Aleks ''Koritiba''nın futbol direktoru vəzifəsinə təyin olunub. Artıq bu klubun gələcəyi ilə bağlı bütün strateji qərarları məhz Aleks verəcək. ''Koritiba''nın səhmlərinin 90 faizinə sahib olan ''Treecorp'' şirkətinin rəsmiləri ilə keçirdiyi toplantının ardından Aleks rəsmən öz doğma klubunun futbol direktoru seçilib.

Ümumiyyətlə, daha iddialı bir kluba çevrilmək istəyən ''Koritiba''da rəhbərlik səviyyəsində ciddi dəyişikliklər baş verib. Buna qədər ''İnternasyonal''da çalışan Andre Matsuko Qabriel Limanın ayrılmasından sonra ''Koritiba''da idarə heyətinin yeni sədri seçilib. Aleksin baş məşqçiliklə birdəfəlik vidalaşması, yoxsa müvəqqəti olaraq özünü başqa vəzifədə sınamaq istəməsi barədə dəqiq məlumat yoxdu. 115 illik tarixə malik ''Koritiba''nın Braziliya futbolunda o qədər də ciddi uğurları yoxdu. Bu klub son olaraq 2023-cü ilə elitada oynayıb.

Aleks hər nə qədər ''Fənərbaxça''nın əfsanəsi hesab olunsa da, ''Koritiba'' da onun karyerasında xüsusi yer tutur. Əslən Koritibadan olan ''sambaçı''nın peşəkar karyerası həm bu klubda başlayıb, həm də bu klubda bitib. Qeyd edək ki, məşqçilik karyerasına ''San Paulu''nun U-20 komandasında başlayan, daha sonra ''Avai''ni çalışdıran Aleks bu mövsümün əvvəlində Türkiyəyə gələrək ''Antalyaspor''un başına keçmiş və yanvarda istefaya göndərilmişdi.

Komanda onun başçılığı altında keçirdiyi 24 rəsmi oyundan 12 qələbə, 3 heç-heçə, 9 məğlubiyyətlə ayrılmışdı.

ƏLİ