“Fənərbaxça”nın əfsanəsi Aleks de Souzadan yeni xəbər var.

Bilindiyi kimi, futbolçu karyerasını 2015-də başa vuran və daha sonra məşqçiliyə başlayan braziliyalı ötən ilin əvvəllərindən etibarən “San Paulu”nun U-20 komandasının başına keçmişdi. Aleks burda təxminən ilyarım çalışandan sonra ötən ayın sonlarında öz istəyi ilə ayrılmaq qərarına gəlmişdi. Pro lisenziyasına malik olan və artıq böyük futbolda məşqçi kimi ilk addımlarını atmaq istəyən Aleks istəyinə çatıb. Belə ki, o, Braziliya təmsilçisi “Avai”nin başına keçib. Bu klub ötən həftəsonu başa çatan Braziliya çempionatında 19-cu pilləni tutaraq elita ilə vidalaşıb. Qarşıdakı mövsümdə B seriyasında mübarizə aparacaq “Avai” elitaya qayıtmaq hədəfinə Aleksin başçılığı altında çatmağa çalışacaq. Tərəflər arasında çərşənbə axşamı birillik müqavilə imzalanıb. 45 yaşlı mütəxəssis üçün noyabrın 22-də rəsmi imza mərasimi keçiriləcək və o, yeni vəzifəsində fanatlara təqdim olunacaq. Anlaşmanın ardından qısa açıqlama verən Aleks bunları deyib: “Baş məşqçi kimi mənə çalışmaq fürsəti verən “Avai”nin rəhbərliyinə təşəkkürümü bildirirəm. Mənə bəslənən ümidləri doğrultmaq üçün ən yaxşı şəkildə çalışacam”.

Qeyd edək ki, Braziliya mətbuatının iddiasına görə Jorje Jezuş “Fənərbaxça”nın başına keçdikdən sonra Aleksə köməkçi-məşqçi vəzifəsini təklif etsə də o, təklifi geri çevirib. “Fənərbaxça” və Türkiyə çempionatı tarixinin ən yaxşı əcnəbi oyunçularından sayılan Aleks 2004-12-ci illərdə “sarı-lacivərdlilər”də 344 rəsmi oyunda 169 qol, 133 məhsuldar ötürməlik mükəmməl performans sərgiləyərək ümumilikdə 3 çempionluq qazanıb.