“Red Bull”da şübhəli ayrılıq
Xəbər verdiyimiz kimi, “Formula-1” üzrə dünya çempionatında mövsümlərarası fasilə həftəsonu başa çatacaq.
Avtoyarış həvəskarları yeni mövsümün Avstraliyada keçiriləcək ilk mərhələsini izləyəcək. Maraqlıdı ki, mövsümün startına bir həftə qalmış “Red Bull”un texniki direktoru Codi Eqqinton komandadakı vəzifəsini tərk edib. Britaniyalı mütəxəssis bundan sonra karyerasını “Red Bull Advanced Technologies” şirkətində davam etdirəcək.
Eqqintonun komandadakı funksiyaları isə baş texniki direktor Tim Qoss, onun müavini Giyom Kattelani və mühəndis Andrea Landi arasında bölüşdürüləcək.
Codi ayrılıq mesajında bunları yazıb:
“Komandada keçirdiyim 10 il mənə qeyri-adi təcrübə və parlaq anlar bəxş etdi. Ancaq “Formula-1”də keçirdiyim iki onillikdən sonra istiqaməti dəyişməyə qərar verdim. “Red Bull Advanced Technologies”də məni böyük vəzifələr gözləyir – şirkətin gerçəkləşdirməyə çalışdığı parlaq layihələrə mən də töhfə vermək istəyirəm”.
Xatırladaq ki, Eqqinton “Red Bull”da texniki direktor vəzifəsini 2014-cü ildən bəri tuturdu.
