Sizin də yadınızda olar. “Neftçi” Konfrans Liqasında “Beşiktaş”a rəqib olmuşdu. Həmin vaxt “ağ-qaralar”ı çalışdıran rumıniyalı Adrian Mutu rəqibin gücünü şişirtmək üçün təxminən belə demişdi:

Amma biz də yaxşı bilirik ki, xeyli vaxtdı “Beşiktaş” özünə bənzəmir. Ümumiyyətlə, özünü Türkiyənin nəhəngi sayan İstanbul klublarının səviyyəsində geriləmə var.

Elə həmin bu “Beşiktaş”ı Türkiyə çempionatının 26-cı turunda “Qaziantepspor” məğlub etdi. Səlçuk İnanın çalışdırdığı əyalət təmsilçisi İstanbulda əzmkar qələbə qazandı. Bununla da hər kəsi təəccübləndirməyi bacardı. Çünki yeni baş məşqçi Sulşerin gəlişindən sonra “Beşiktaş” uğurlu seriya yaxalamışdı və bir müddət idi azarkeşlərini sevindirirdi. Bu seriya da “Qaziantepspor”la oyunda qırıldı.

Oyunsonrası mətbuat konfransında yerli jurnalistlərdən biri Səlçuk İnana bir qədər qəribə sual verib. Bildirib ki, hesabda önə keçəndən sonra futbolçularınız oyunu soyutdu, qapıçınız “vaxt öldürdü”, sizin bu davranışlarınız doğru idimi? Ötənlərin məşhur futbolçusu bu suala gülümsəyərək reaksiya verib, qarşısındakı jurnalistə xeyli hörmətlə davranıb. Cavabı da belə olub ki, bizim hərəkətlərimizi qiymətləndirmək sizin işinizdi, mən “vaxt öldürməklə” məşğul olduğumuzu düşünmürəm.

İndi bütün Türkiyə İnanın alicənab davranışından danışır, onu alqışlayır. Çünki Türkiyə futbolunda səmimiyyət ab-havası çoxdan, pozulub, uduzan-udan hamı bir-birini, sonra da hakimləri ittiham edir. Azarkeşlər də, mətbuat nümayəndələri də bu havaya düşüb. Ona görə də Səlçuk İnanın onu təxribata çəkməyə çalışan, aşkar “Beşiktaş” azarkeşi kimi sual səsləndirən şəxsə gülümsəməsi, hətta təşəkkür etməsi hər kəsin ürəyincə olub. Türkiyə futbol camiəsi ümid edir ki, çalışdırıcının bu davranışı başqalarına da nümunə olacaq, bundan sonra hamı bir-birinə daha hörmətlə yanaşacaq.

Bu həftə Azərbaycanda da oyunsonrası mətbuat konfransı, daha doğrusu, orda jurnalistlə baş məşqçi arasındakı dialoq gündəm oldu. Amma bizdə Türkiyədəkindən fərqli bu dialoq mənfi aurası ilə yaddaşlarda qaldı. Həmkarlarımızdan biri Samir Abasova komandasının “Kəpəz”ə qəsdən uduzmasıyla bağlı fikirlər səsləndirildiyini xatırladıb.

Bəli, belə fikirlər hamımızın qarşısına çıxıb. “Neftçi” azarkeşlərinin yer aldığı sosial şəbəkə səhifələrində “ağ-qaralar”ın bilərəkdən uduzduğu, kubokla premyer-liqa arasında dəyiş-düyüş edildiyi iddia edilib. İmanımı yandırıb nəsə deyə bilmərəm. Amma favorit komandaların hər məğlubiyyətindən sonra belə söhbətlər yayılır. Üstəlik “Neftçi” bir neçə gün əvvəl “Kəpəz”i kubokdan kənarlaşdırmaqla ondan güclü olduğunu da isbatlayıb. Belədə hansısa azarkeşin şübhəyə düşməsi təəccüblü deyil.
Elə Samir Abasova ünvanlanan sual da bu şübhələrin əsasında səsləndirildi.

Təəssüf ki, “Neftçi”nin baş məşqçisi artıq neçənci dəfədi belə sualları aqressiv qarşılayır. Onun həmin suala cavab vermək üçün şərt irəli sürməsi, kameraların söndürülməsi, xanımların zaldan çıxarılması niyyətin nə olduğundan xəbər verir. Yəqin Samir Abasov məsələni söyüş söymək səviyyəsinə çıxarmaq, “yalan deyən belə-belə olsun” demək istəyirmiş. Halbuki Səlçuk İnan kimi gülümsəmək, xoşun gəlməyən sualı belə təbəssümlə qarşılayıb, zarafatyana reaksiya göstərmək də mümkün idi. “Neftçi”nin zəif oynaması, azlıqda qalan rəqibə belə bata bilməməsi ki, şübhə deyil, acı reallıqdı. Samir bəy bu acı reallığı qəbul etməli, gözə kül, qulağa yalan üfürməyə çalışmamalıdı.

Mətbuat konfransında pozitiv davranışı da öyrənmək üçün yetərincə nümunələr var. Sözün düzünü deyən üçün kameraların yanmasının, yoxsa sönməsinin heç bir fərqi yoxdu.

AMAL