''Beşiktaş'' kabus kimi bir mövsüm keçirməkdə davam edir.

İstanbul nəhəngi dünən superliqanın 32-ci turunda debütant ''Samsunspor''u qəbul etdi. 3-cü pillədəki ''Trabzonspor''la xal fərqini 3-ə endirmək fürsəti yaxalayan ''Qartal'' bundan yararlana bilmədi. Komanda hesabı açsa da, qələbəni qoruya bilməyərək 1 xalla kifayətləndi (1:1). Qələbəsiz seriya 5 oyuna çatdı.

Fanatlar tərəfindən istefaya dəvət olunan Fernando Santuş oyunsonrası mətbuat konfransında ayrılmaq niyyətinin olmadığını və kubokun finalına qədər komandanın başında yer alacağını dedi. Maraqlıdı ki, o, bu sözlərindən cəmi yarım saat sonra istefaya göndərildi! Klubdan verilən rəsmi açıqlamada Santuşa 500 min avro təzminat ödəniləcəyi qeyd olundu.

Beləliklə, ''Beşiktaş''da Santuş dönəmi 3 aydan bir qədər artıq çəkdi. Portuqaliyanı AÇ-2016-nın qalibi edən bu mütəxəssis yanvarın 7-də ''ağ-qaralar''ın başına keçmişdi. Komanda onun başçılığı altında keçirdiyi 16 rəsmi oyundan 7 qələbə, 4 heç-heçə, 5 məğlubiyyətlə ayrılmış oldu. Santuş bu mövsüm Şenol Günəş və Rza Çalımbaydan sonra ''Beşiktaş''da istefaya göndərilən 3-cü baş məşqçi oldu. Bu 3 mütəxəssisdən başqa komandada bu mövsüm Burak Yılmaz və Sərdar Topraktəpə də baş məşqçi səlahiyyətlərini icra edib. Yeri gəlmişkən klubdan verilən rəsmi açıqlamada məhz Topraktəpənin mövsümün sonuna qədər yenidən bu vəzifəni icra edəcəyi açıqlanıb. ''Beşiktaş''ın U-19 komandasının məşqçisi olan 47 yaşlı bu mütəxəssis Çalımbay qovulduqdan sonra və Santuş gələnə qədər olan müddətdə 3 oyunda baş məşqçi səlahiyyətlərini icra etmişdi. ''Beşiktaş'' həmin 3 oyundan 2 qələbə, 1 məğlubiyyətlə ayrılmışdı.

ƏLİ