Kapitan ''Liverpul''luları ümidləndirməyə çalışdı
''Liverpul'' üçün ötən həftə kabus kimi keçdi. Əla mövsüm keçirən və premyer-liqada inamla turnir cədvəlinə başçılıq edən ''qırmızılar'' Çempionlar Liqasında da əsas favorit sayılırdılar.
''Football-plus.az'' xəbər verir ki, mersisaydlılar 4 gün ara ilə həm PSJ-yə uduzaraq ÇL-də mübarizəni dayandırdılar, həm də liqa kubokunun finalında gözlənilmədən ''Nyukasl''a məğlub oldular. İndi ''Liverpul''un bu mövsüm üçün qazana biləcəyi yeganə turnir premyer-liqadı. Ölkə kubokunda isə Arne Slotun kollektivi daha öncə mübarizəni dayandırmışdı.
Komandanın kapitanı və təcrübəli futbolçusu Vircil van Diyk son uğursuzluqların ardından açıqlamalar verib. O, komandadakı enişə rəğmən mübarizə aparmaqda davam edəcəklərini deyib:
''Təəssüf ki, futbolda hər şey məhz bu cür qurulub. 4-5 gün ərzində iki dəfə uduzduq və sanki dünya üzərimizə yıxıldı. İnsanlar bərbad olduğumuzu və hər şeyin çökdüyünü söyləməyə başladılar. Halbuki cəmi 2 həftə öncəyə qədər az qala ideala yaxın mövsüm keçirirdik. Qarşıda hələ premyer-liqanın 9 oyunu var. Ona görə mövsümün başından bəri hədəflədiyimiz ən önəmli turnir üçün savaşmaqda davam etməliyik. Mövsümün əvvəlində bizi çempionluğa namizədlər arasında görənlərin sayı elə də çox deyildi. Bu, qazanılması ən çətin olan turnirdi və hələ də hər şey öz əlimizdədi. Yəni irəliyə ümidlə baxmalıyıq və bu müddətdə üzərimizdə çox çalışmalıyıq''.
ƏLİ
Digər xəbərlər
