“Fənərbaxça” İstanbulda nokauta düşdü - ŞƏRH
“Fənərbaxça” fanatlarının “Reyncers”lə qarşılaşmaya ümidlə baxmağa haqqı çatırdı. Hər halda, İstanbul nəhəngi Qlazqo nəhəngi ilə müqayisədə həm daha yaxşı formada idi, həm də heyətinin dəyərinə görə rəqibi qat-qat üstələyirdi. Amma bunlar yalnız kağız üzərində olan üstünlüklər idi. Meydanda isə tam əks bir mənzərənin şahidi olduq.
Fredin cəza üzündən oynamadığı qarşılaşma “Fənər” üçün uğursuz başladı. Artıq 7-ci dəqiqədə Şimanskinin öz cərimə meydançası həndəvərində texnika nümayiş etdirmək arzusuna düşməsi qolun buraxılması ilə nəticələndi. Dessers qapıçını da keçərək topu tora göndərdi. İlk baxışdan Çağlar vaxtında müdaxilə edərək topu uzaqlaşdırdı. Amma hakimin qolundakı cihaz işə düşdü. Təkrarda da topun xətti azacıq keçdiyi göründü. Çağlar çox keçmədən zədələnərək Ciku ilə əvəzləndi. Məhz qanalı müdafiəçi yarım saatın tamamında künc zərbəsi zamanı çətin vəziyyətdə olmasına baxmayaraq, bir toxunuşla topu tora göndərdi. Amma özünə bənzəməyən Joze Mourinyonun komandası qolun davamını gətirə bilmədi.
Hiss olunurdu ki, “Reyncers” oyuna çox yaxşı hazırlaşıb. Qonaqlar diqqətli şəkildə müdafiə olunaraq sürətli əks-hücum üçün hətta ən kiçik şansdan da istifadə etməyə çalışırdılar. Belə hücumlardan biri fasilə ərəfəsində reallaşdı. Gözəl qurulan hücumu Çernı dəqiq tamamladı. Amrabatla Şimanski bu oyunda meydanın mərkəzini sanki rəqibə təslim etdi. Mourinyo fasilədə 4-4-2-yə keçərək Yusuf Akçiçəyin yerinə Talişkanı meydana buraxdı. Amma “sambaçı” da komandanın oyununu canlandıra bilmədi. İkinci hissənin əvvəllərində “Reyncers” 5 dəqiqə aralığında iki qol vurdu. Amma hər iki qolda VAR-ın müdaxiləsi ilə ofsayd qeydə alındı. Hətta bu məqam da “sarı-lacivərdlilər”ə kömək etmədi.
Bəzən elə təəssürat yaranırdı ki, meydan sahibi “Fənər” yox, “Reyncers”di. Kortəbii hücumları davam etdirən və cinah asmalarından başqa ortaya heç nə qoymayan İstanbul nəhəngi oyunun sonlarına yaxın daha bir dəfə mərkəzə dəvət olundu. İldırım sürəti ilə qurulan daha bir əks-hücum zamanı Çernı dublunu rəsmiləşdirdi. Qəribə səslənsə də, “Fənər” əslində bu nəticəyə sevinməlidi. Çünki fərq daha böyük ola bilərdi. Bunu oyunsonrası mətbuat konfransında Mourinyo da etiraf etdi. Səfərdə iki topluq fərqi aradan qaldırmaq çox çətin məsələ kimi görünsə də, mümkünsüz deyil. Özü də nəzərə alaq ki, “Reyncers” evdə keçirdiyi son 3 rəsmi oyunda məğlub olub! “Fənərbaxça”ya da uduzacağı təqdirdə bu komanda 152 illik tarixi ərzində ilk dəfə evdə ardıcıl 4 rəsmi oyundan məğlubiyyətlə ayrılmış olacaq...
Avropa Liqası, 1/8 final, ilk oyun
Fənərbaxça – Reyncers (Şotlandiya) 1:3
Ciku, 30 – Dessers, 7. Çernı 42; 81.
Fənərbaxça: İrfan Can Eğribayat, Mərt Müldür (İrfan Can Kahveci, 79), Çağlar Söyüncü (Ciku, 16), Şkrinyar, Yusuf Akçiçək (Talişka, 46), Kostiç, Amrabat, Şimanski (Sen-Maksimen, 54), Tadiç, Ceko, Ən-Nəsiri.
Faktlar
* “Fənərbaxça” avrokuboklarda 285-ci oyunda 112-ci məğlubiyyətlə üzləşdi (112 qələbə, 61 heç-heçə, top fərqi - 389:407).
* “Fənərbaxça”nın 18 oyunluq məğlubiyyətsiz seriyası başa çatdı (13 qələbə, 5 heç-heçə). Son məğlubiyyət dekabrın 11-də AL-in əsas mərhələsində “Atletik”lə ev oyununda qeydə alınmışdı (0:2).
* “Fənərbaxça” AL-də qrupdan sonrakı mərhələlərdə, yəni pley-offda evdə keçirdiyi 12-ci oyunda ilk dəfə məğlub oldu (8 qələbə, 3 heç-heçə)!
* Ciku karyerasında ilk dəfə avrokuboklarda qol vurdu və karyerasında ilk dəfə sonradan meydana çıxdığı rəsmi oyunda fərqləndi.
* “Fənərbaxça” Şotlandiya təmsilçilərinə qarşı keçirdiyi 5-ci oyunda ilk dəfə məğlub oldu. İstanbul nəhəngi buna qədər 2-si “Reyncers”, 2-si “Seltik”ə qarşı olmaqla Şotlandiya klublarına qarşı keçirdiyi 4 oyundan 1 qələbə, 3 bərabərliklə ayrılmışdı.
* “Reyncers” Türkiyə klublarına qarşı keçirdiyi 10-cu oyunda 5-ci qələbəsini qazandı (3 heç-heçə, 2 məğlubiyyət).
Oyundan sonra
Joze Mourinyo, “Fənərbaxça”nın baş məşqçisi:
“Tam layiqli şəkildə uduzduq. Meydanın hər yerində bərbad təsir bağışladıq. Demək olar, bütün ikili mübarizələrdə məğlub olduq. Çoxlu səhvə yol verdik. “Reyncers” isə səhv etmədi. İrəlidə bəzi fürsətlər yaxalasaq da, yararlana bilmədik. Oyun qurmaq baxımından Fredin yoxluğunu hiss etdik. Müdafiədən hücuma sürətlə çıxa bilmədik. İrəlidə hərəkətli deyildik. Uzun sözün qısası, zəif performans sərgilədik və bu nəticəni qəbul etməliyik. Dessers yaxşı futbolçu olsa da, dünyanın ən güclü oyunçusu deyil. Amma bizim ikinci hissədəki performansımız onu məhz belə oyunçu kimi göstərdi. Bütün hava toplarını götürdü. Fanatlarımız da komanda kimi zəif nəzərə çarpdı. Bizə güclü dəstək verə bilmədilər. Bu gün mən də, fanatlar da, oyunçular da ümidləri doğrultmadıq. Amma “Reyncers” “Aybroks”da yaxşı dəstəklənəcək. Oranın atmosferini gözəl bilirəm. Bu gün üçün özümüzdən başqa heç kimi günahlandıra bilmərik. Əslində bu oyuna görə bu hesab yaxşıdı. Bundan da böyük fərqlə uduza bilərdik. Bəlkə də bir penaltimiz verilmədi. Amma bu cür zəif futboldan sonra hakimi günahlandırmaq düzgün deyil. 1:3 geridə olsaq da, cavab oyunu da var. Yeganə təsəllimiz qarşıda hələ daha bir 90 dəqiqənin olmasıdı. Cütün taleyi hələ müəyyənləşməyib. Rəqibə məsləhət görərdim ki, indidən növbəti mərhələyə yüksəlməyi qeyd etməsinlər”.
Barri Ferqyuson, “Reyncers”in baş məşqçisi:
“Yaxşı və istəkli oynadıq. Bir an olsun konsentrasiyanı itirmədik. Futbolçularımla qürur duyuram. Onlar bu mövsüm bir çox çətinlikdən keçərək buralara gəliblər. Amma diqqətli olmalı və cavab oyununa da ən yaxşı şəkildə hazırlaşmalıyıq. Çünki rəqibin başında dünyanın ən yaxşı məşqçilərindən biri dayanıb. Deməzdim ki, Mourinyoya qalib gəldim. Sadəcə, bu oyun üçün bizə uğur qazandıra biləcəyinə inandığımız bir taktika seçdik. Həmin taktikanı oyunçulara cəmi 1 saata anlada bildim. İstəklərimin hamısını yerinə yetirdilər və qürur duyulası performans sərgilədilər. Hətta iki qolumuzun sayılmamasına baxmayaraq, həvəsdən düşmədik və eyni oyunu davam etdirdik. Bu mövsüm “Aybroks”dakı oyunlarda bir neçə dəfə problem yaşamışıq. Bunu aradan qaldırmalıyıq. “Fənərbaxça” ilə bağlı fikirlərim dəyişməyib. Çox yaxşı, hətta bu turniri qazana biləcək səviyyədə bir komandadı. Çox səviyyəli futbolçulara malikdilər. Ona görə də cütün taleyinin həll olunduğunu desəm, axmaqlıq etmiş olaram”.
Digər xəbərlər
