Futbolda hər kiçik detalın, hətta topdaşıyanların da böyük önəm kəsb etdiyini ''Fənərbaxça'' - ''Konyaspor'' oyununda bir daha gördük.

Məlum olduğu kimi bu qarşılaşmada İstanbul nəhəngi rəqibini 7-1 hesabı ilə darmadağın etdi. Meydan sahiblərinin vurduğu 3-cü qolda futbolçular qədər topdaşıyanın da rolu oldu. Belə ki, o, top meydanı tərk edən kimi əlindəki topu dərhal İrfan Can Kahveciyə atdı. İrfan da vaxt itirmədən autu yerinə yetirərək Şimanskini faktiki olaraq qapıçı ilə təkbətək çıxardı. Şimanskinin ötürməsindən sonra Ceko topu boş qapıya göndərdi və topdaşıyan oğlanın başladığı hücum qolla nəticələndi! Təsadüfi deyil ki, İrfan Can da həmin qoldan sonra ilk növbədə topdaşıyanı qucaqladı.

Bu arada məlum olub ki, həmin topdaşıyan ''Fənərbaxça''nın U-15 komandasının qapıçısı Yiğit Avcıdı. O, dünən rəhbərliyin dəvəti ilə ''Can Bartu'' bazasına gələrək İrfan Can Kahveci ilə xatirə şəkili çəkdirib. İrfan Can ona öz imzalı formasını hədiyyə verib.

ƏLİ