Tuxel ailəsini İngiltərə yığmasından üstün tutur?
Bildiyiniz kimi, almaniyalı Tomas Tuxel İngiltərə Futbol Assosiasiyası (İFA) ilə bu ölkənin yığmasını çalışdırmaqla bağlı müqavilə bağlayıb. Maaşı 5 milyon funt olan, 18 aylıq müqavilə bağlayan mütəxəssisin qarşısına 2026-cı ildə keçiriləcək dünya çempionatının qalibi olmaq vəzifəsi qoyulub. Ancaq belə görünür ki, onun da xüsusi şərtləri var...
"Football-plus.az" xəbər verir ki, ötən il oktyabrın 16-da baş məşqçi kimi təqdim olunan Tuxel İngiltərə yığmasını ilk oyuna yalnız martın 21-də çıxaracaq. “Üç şir” həmin gün DÇ-nin seçmə oyununda Albaniya ilə qarşılaşacaq. Belə məlum olur ki, İFA Tuxelə sabiq xanımından olan uşaqlarını görmək üçün müntəzəm Almaniyaya baş çəkmək imkanı yaradıb. Bu icazə isə ona səbəb olub ki, mütəxəssis yeni vəzifədəki ilk 7 həftədə premyer-liqanın üç turunu, İngiltərə kubokunun 3-cü mərhələsini və Liqa kubokunun bütün yarımfinal oyunlarını buraxıb.
İşə yalnız yanvarda başlayan Tuxel belə çox oyunu buraxmasını Almaniyada ailəsi ilə birgə daha çox vaxt keçirmək istəyi ilə izah edir. Bununla belə, İFA mütəxəssisin tərəfini tutur, iddia edir ki, o, vəzifə başında olduğu ilk 47 gündə ingiltərəli futbolçuların oyununu dəyərləndirmək üçün İngiltərədə və ölkə xaricində keçirilən 17 oyun izləyib. Ancaq yanvarın 4-6-sı aralığında keçirilən dörd oyunu izləyəndən sonra Tuxeli yanvarın 14-nə qədər stadionlarda görən olmayıb. O, həmçinin Çempionlar Liqasının Parisdə keçirilən PSJ – “Mançester Siti” oyununu da tribunadan izləyib. Fevralda onu Milan derbisində (Kayl Uokeri izləməyə getmişdi) və Cud Bellingemə baxmaq üçün yollandığı Madriddə görüblər.
İFA-nın bununla bağlı açıqlamasında deyilir:
“Tuxel İngiltərədə və ölkə xaricində keçirilən 17 oyunda olub ki, ingiltərəli oyunçuları izləsin. Yanvarda “sükan arxasına” keçəndən bəri tam gücü ilə çalışır ki, gələn ay ilk dəfə yığmanın heyətini açıqlasın”. İFA həmçinin Tuxelin oktyabrda keçirdiyi mətbuat konfransında söylədiyi fikirləri əsas gətirib: “İngiltərədə yaşamağı xoşlayıram. Səbirsizliklə yenidən İngiltərədə işləməyə başlayacağım günü gözləyirəm. Ancaq əlbəttə, oyunların qrafiki mənə Almaniyada - ailəmin və uşaqlarımın yanında olmağa imkan verir. Bununla belə, vaxtımı əsasən İngiltərədə keçirəcəm”.
Maraqlıdı ki, 2021-ci ildən bəri İngiltərənin qadınlardan ibarət yığmasını çalışdıran niderlandlı Sarina Viqman bu ölkənin mədəniyyətinə uyğunlaşmaq üçün birdəfəlik köçməyə qərar verib. Elə Tuxelin sələflərindən Sven-Yoran Erikssion və Fabio Kapello da Londonda yaşayır, daum İngiltərə stadionlarında görünürdü.
Müntəzəm vətəninə baş çəkmək Tuxelin İngiltərə yığmasını uğurla çalışdırmasına imkan verəcəkmi? Yoxsa vacib oyunları buraxması DÇ-2026-ya hazırlığa mənfi təsir göstərəcək? Bunu zaman göstərəcək. Hələlik isə bəlli olan budu ki, bu məqam azarkeşlərdə və ekspertlərdə narahatlıq doğurur.
Digər xəbərlər
