Tomas Tuxel müəyyən müddətdən sonra İngiltərədə işləyəcək. O, bu ölkənin milli komandasını çalışdıracaq.

“Sky Sports”un bir neçə gün əvvəl yaydığı məlumatda İngiltərə yığmasının baş məşqçi vəzifəsinə əsas namizədin məhz Tuxel olduğu vurğulanmışdı. Son günlər yığma üçün yeni baş məşqçi axtarışını sürətləndirən İngiltərə Futbol Assosiasiyası (İFA) artıq alman mütəxəssislə razılığa gəlib. Yerli mənbələr 51 yaşlı məşqçi ilə 18 aylıq müqavilə imzalanacağını və Tuxelin yeni iş yerində fəaliyyətə rəsmən gələn il yanvarın 1-dən başlayacağını xəbər verib.

İngiltərə yığmasının sonuncu baş məşqçisi olan Qaret Sautqeyt AÇ-2024-dən sonra vəzifəsindən ayrılıb. Tuxelə gəlincə, onun 2021-22-ci illərdə “Çelsi”ni çalışdırdığını xatırladaq. Əlavə edək ki, İngiltərə futbol ictimaiyyəti alman mütəxəssisin əsas komandaya təyinatını heç də birmənalı qarşılamır.