İstanbul nəhəngləri maddi cəhətdən gücləndiyi vaxtda Anadolu təmsilçiləri borcun içində üzür. Onların durumu günü-gündən qəlizləşir. Bu da aradakı səviyyə fərqinin artmasına səbəb olur.

''Football-plus.az'' xəbər verir ki, FİFA-nın Türkiyə çempionatında çıxış edən daha bir kluba transfer cəzası verdiyi məlum olub. Söhbət heç də yaxşı mövsüm keçirməyən və elitanı tərk etmək təhlükəsi yaşayan ''Sivasspor''dan gedir.

FİFA-nın rəsmi saytında yerləşdirilən xəbərdə ''yiğidolar''a qarşıdakı 3 dönəm üçün transfer cəzası verildiyi qeyd olunub. Düzdü, xəbərdə cəzanın konkret səbəbi göstərilməyib. Amma belə güman olunur ki, cəza yaxın keçmişdə bu klubda oynamış hansısa futbolçuya olan borcun ödənilməməsindən qaynaqlanır. Hər halda Türkiyə klubları 90 faiz hallarda məhz bu üzdən transfer cəzası alır.

Yeri gəlmişkən, ''Sivasspor''la birlikdə hazırda superliqada analoji cəzası qüvvədə olan klubların sayı 6-ya çatdı!

''Samsunspor'', ''Antalyaspor'', ''Kayserispor'', ''Adana Dəmirspor'' və ''Hatayspor''un da transfer cəzası davam edir. Qeyd olunan klublar məhz bu səbəbə görə bu qış heyətlərini gücləndirə bilmədilər. ''Sivasspor'' isə qışda 3 yeni futbolçu transfer etdi. Komandanın cəzası yay ''pəncərəsi''ndən etibarən tətbiq olunacaq.

Yaxın müddətdə klubdan bu şok cəza ilə bağlı rəsmi açıqlama veriləcəyi gözlənilir.

ƏLİ