Volkan Dəmirəlin təyinatından sonra yüksəlişə keçən ''Hatayspor''la bağlı dünən Türkiyə mətbuatında sürpriz bir iddia gündəmə gəldi.

''Fanatik'' nəşrinin iddiasına görə FİFA superliqa təmsilçisinə qarşıdakı 3 transfer dönəmi üçün transfer qadağası qoydu! Səbəb isə klubun sabiq futbolçusu Pablo Santosa olan borcunu vaxtında ödəməməsidi. Qeyd edək ki, hazırda Səudiyyə Ərəbistanı təmsilçisi ''Əl-Rayed''də forma geyən 30 yaşlı braziliyalı mərkəz müdafiəçisi 2020/21-i icarə əsasında ''Hatayspor''da keçirmişdi. O vaxt müqavilə ilə ''Braqa''ya məxsus olan ''sambaçı'' Hatay klubunda 36 oyuna çıxaraq bir qol vurmuş və 2021-in yayında Türkiyədən ayrılmışdı. Santos ayrılandan sonra futbolçunun meneceri Xose Rebelo da Silva klubun onlara 30 min avro borcunun olduğunu bildirərək FİFA-ya şikayət etmişdi. Burda ən çox təəccüb doğuran məqam borcun məbləğidi. Çünki 30 min avro müasir futbolda çox cüzi məbləğ sayılır. Amma ''Hatayspor'' rəsmiləri bu pulu ödəməkdən imtina edincə, srağagün FİFA-dan kluba məktub gəldi.

Orda qeyd olundu ki, ''Hatayspor''un faizlərlə birlikdə futbolçuya olan borcu 32038 avroya çatıb. Eyni zamanda kluba əlavə 5 min avro para cəzası verildi və transfer qadağası qoyuldu. Yalnız FİFA-dan rəsmi sənəd gələndən sonra klub rəsmiləri əl-ayağa düşərək dünən gün ərzində tələb olunan məbləği ödədilər. Daha sonra məbləğin ödənilməsi ilə bağlı sənəd FİFA-ya göndərildi. Ona görə də transfer qadağasının ən qısa müddətdə aradan qaldırılacağı gözlənilir. Maraqlıdı ki, dünən klubdan verilən rəsmi açıqlamada FİFA tərəfindən ''Hatayspor''a transfer qadağası qoyulmadığı qeyd olundu.

Açıqlamada vurğulandı ki, tələb olunan məbləğ vaxtında ödənildiyi üçün transfer qadağasından söhbət gedə bilməz. Hər halda, fakt budu ki, futbolçu 1 il öncə şikayət etdiyi halda, onun pulu yalnız bugünlərdə ödənildi. Mövsümə Sərkan Özbaltanın başçılığı altında başlayan ''Hatayspor'' ilk 6 oyuna cəmi 1 xal toplamışdı. Amma Volkan Dəmirəllə anlaşdıqdan sonra əvvəlcə ''Sivasspor''u (2:1), sonra da evdə ''Alanyaspor''u (1:0) məğlub edən Hatay təmsilçisi son 2 turda maksimum xal toplayıb.