Türkiyədə Anadolu klublarının böyük əksəriyyəti maddi sıxıntılar yaşamaqda davam edir. Ona görə də İstanbul nəhəngləri ilə digər klublar arasında maddi baxımdan səviyyə fərqi günü-gündən artır.

Sıxıntılar içində olan klublardan biri də ''Hatayspor''du. Superliqada işləri qaydasında getməyən Hatay təmsilçisində bu yaxınlarda həm baş məşqçi Rza Çalımbay, həm də klub prezidenti Levent Mıstıkoğlu istefa vermişdi. İndi də bu kluba transfer cəzası verilib! Belə ki, ''Hatayspor'' Aaron Bupendzanın menecerinə olan borcunu hələ də ödəməyib.

Xatırlayırsızsa, qabonlu Bupendza 2020/21-də bu komandanın heyətində fırtına kimi əsmiş və 22 qolla Türkiyə çempionatının bombardiri olmuşdu. 28 yaşlı futbolçu həmin vaxtdan bu yana ''Əl-Ərəbi'', ''Əl-Şabab'', ''Sinsinnati''də top qovub. Bu mövsüm Bupendza türkiyəli futbolsevərlərə gözəl tanış olan Marius Şumudikanın çalışdırdığı Buxarest ''Dinamo''sunda çıxış edir.

Bupendzanın meneceri ''Hatayspor''dan pulunu ala bilməyincə, FİFA-ya üz tutmuş və qalib gəlmişdi. Türkiyə təmsilçisi daha sonra məsələni İdman Arbitraj Məhkəməsinə daşıdı. Amma CAS da Bupendzanın menecerinin lehinə qərar verərək FİFA-nın qərarını qüvvədə saxladı. ''Hatayspor'' bu transfer dönəmində heyətinə yeni oyunçu qata bilməyəcək.

Hətta Türkiyə mətbuatının yazdığına inansaq, vəziyyət daha da ciddidi və klubun başqa borcları da var. Bu borclar ödənilməsə, ''Hatayspor''a artıq xal cəzası veriləcək. Prezidentsiz və baş məşqçisiz qalan klubun bu çətin dönəmin öhdəsindən necə gələcəyi maraq doğurur.

Klubdan hələ ki, bütün bu məsələlərlə bağlı rəsmi açıqlama verilməyib. ''Hatayspor'' hazırda 16 oyuna topladığı 9 xalla sondan əvvəlki - 18-ci pillədədi. Bu komanda yeni ildən sonra ilk oyununu səfərdə ''Fənərbaxça''ya qarşı keçirəcək.

ƏLİ