UEFA tərəfindən bir kluba verilən cəzanın artırılmasına nadir hallarda rast gəlinir.

"Football-plus.az" xəbər verir ki, bu hadisə ''Sivasspor''un başına gəlib.

Bilindiyi kimi Türkiyə təmsilçisi ötən mövsüm avrokuboklarda yaxşı çıxış edərək Konfrans Liqasının 1/8 finalına qədər irəliləmiş, amma ''Fiorentina'' səddini aşa bilməmişdi. Sivaslıların 1:4 hesabı ilə uduzduqları evdəki matçın sonlarına yaxın qanqaraldıcı hadisə baş vermişdi. Yerli fanatlardan biri oyunun son anlarında meydana çıxaraq qonaqların üzvü Alessandro Byankonun sifətinə zərbə endirmişdi. Nəticədə 20 yaşlı yarımmüdafiəçinin sifəti qanamış və burnu qırılmışdı.

UEFA bu hadisəyə görə ''Sivasspor''a Avropada növbəti ev oyununu azarkeşsiz keçirmək cəzası vermişdi. Amma UEFA-nın Etika və İntizam müfəttişi cəzanın yüngül olduğunu bildirərək onun artırılmasını tələb etdi. UEFA müfəttişin tələbini qəbul edərək ''Sivasspor''un cəzasını 1 oyundan, 2 oyuna yüksəldib. Yəni komanda avrokuboklarda növbəti 2 ev oyununu azarkeşsiz keçirməli olacaq

Bundan başqa ''yiğidolar'' 50 min avro para cəzası da ödəyəcəklər.