Son turda uduzmaqla tarixi qələbə seriyası qırılan ''Qalatasaray'' indi də başqa bir məlumatla sarsılıb.

"Football-plus.az" xəbər verir ki, FİFA tərəfindən İstanbul nəhənginə transfer cəzası verilib! Komanda bu mövsüm artıq bir dəfə bu cür cəza almışdı. Çünki Lukas Torreyranın ilk klubuna yetişdirmə məbləği ödənilməmişdi. Amma həmin məbləğ ödənildikdən sonra cəza aradan qaldırılmışdı. Bu dəfə ''Aslan'' sabiq oyunçusu Sofian Fequlinin güdazına gedib. FİFA əlcəzairli futbolçunun şikayətinə baxıb və onu haqlı sayıb. ''Qalatasaray'' Fequliyə borcunu ödəməyənə qədər bu yay transfer həyata keçirə bilməyəcək!

Xatırladaq ki, ''Cim-Bom''la müqaviləsi ötən ilin mayın 31-də başa çatan və klubdan ayrılan Fequli 1,6 milyon avro tələb edərək FİFA-ya şikayət etmişdi. O, 3 aylıq maaşının, hər oyun və qələbə üçün nəzərdə tutulan bonusların və evinin kirayə haqqının ödənilmədiyini iddia etmişdi. Meneceri isə ümumi məbləğin üstünə 10 faiz gecikmə pulu da əlavə edərək FİFA-ya üz tutmuşdu. 33 yaşlı Fequli ''Qalatasaray''da 2017-22-ci illərdə çıxış edib. Bu müddətdə 4 titul qazanıb və 162 rəsmi oyunda 34 qol, 32 məhsuldar ötürməlik performans sərgiləyib.

ƏLİ