Bəzi Türkiyə təmsilçiləri maddi cəhətdən çətin dönəm keçirməkdə davam edirlər. Belə klublardan biri “Antalyaspor”du.

Sərgən Yalçının komandası keçmiş borcları üzündən dekabrda FİFA tərəfindən 3 dönəm üçün transfer cəzası almışdı. Yəni Antalya təmsilçisi bir də 2025-in yayında heyətinə yeni futbolçu cəlb edə biləcəkdi. Amma martın 11-də FİFA-nın rəsmi saytında yer alan “cəzalar” bölməsində “Antalyaspor”la bağlı yeni qərar yerləşdirildi. Belə ki, “ağ-qırmızılar”a verilən 3 dönəm transfer cəzası qeyri-müəyyən müddətlik transfer cəzası ilə əvəzlənib. Yəni klub borclu olduğu futbolçulara borcları tam ödəyənə qədər bu cəza qüvvədə qalacaq! Konkret desək, antalyalıların hazırda Erkan Eyibil, Amar Gercaliu və Qustavo Blanko Leşuka ümumilikdə 780 min avro borcu var. Bura ötən mövsümün qış fasiləsində pulunu ala bilımədiyinə görə müqaviləni qarşılıqlı şəkildə ləğv edərək FİFA-ya üz tutan Luis Adrianoya ödəniləcək təzminatı da əlavə etsək, məbləğ 1,5 milyon avroya yüksəlir. Hələ nəzərə alaq ki, bir müddət öncə qalmaqallı şəkildə Türkiyədən vətəni İsrailə deportasiya olunan Saqiv Yehezkelin məsələsi də həllini FİFA-da tapacaq. Çünki İsrailə dəstək verdiyinə görə Türkiyədən qovulan, amma müqaviləsi ləğv edilməyən Yehezkel “Antalyaspor”dan FİFA-ya şikayət edib. Amma maraqlıdı ki, klub prezidenti Sinan Boztəpə jurnalistlərlə görüşdə durumun ciddi olmadığını və 200 min avro ödəniləcəyi təqdirdə transfer qadağasının aradan götürüləcəyini söyləyib. Hazırda “Antalyaspor”dan başqa daha iki klub – “Ankaragücü” və “Konyaspor” da transfer qadağası ilə üz-üzədi. “Ankaragücü” bir müddət öncə borclarının bir qismini ödəmiş, cəzadan qurtulmuş və bunun sayəsində qış transfer dönəmində heyətinə yeni futbolçular cəlb etmişdi. Ancaq qeyd etdiyimiz kimi, FİFA-nın bu həftə açıqladığı siyahıda yenidən paytaxt təmsilçisinin adına rast gəlmək olar. Bu kluba, eləcə də Konya təmsilçisinə 3 dönəm üçün transfer cəzası verilib.

Yeri gəlmişkən, FİFA-nın Mübahisəli Məsələlər üzrə Komitəsi “Beşiktaş”la bağlı da qərar verib. Belə ki, bir müddət öncə Tayler Boyd pulunu ala bilmədiyinə görə İstanbul nəhəngindən şikayət etmişdi. Komitənin qərarı ilə “ağ-qaralar” amerikalı futbolçuya 956 min avro ödəməlidi. Bu məbləğin üzərinə faiz də gələcək. Çünki Boydun müqaviləsi hələ 2022-nin noyabrında ləğv olunmuşdu. “Beşiktaş” bu futbolçunu 2019-un yayında 2,4 milyon avroya Portuqaliya təmsilçisi “Gimaraynş”dan transfer etmişdi. 3,5 mövsüm müqavilə ilə “ağ-qaralar”a məxsus olan, amma arada “Sivasspor” və “Çaykur Rizəspor”da icarə əsasında top qovan 29 yaşlı futbolçu İstanbul nəhəngində cəmi 35 rəsmi oyuna çıxaraq 4 qol vura bildi. Onu da xatırladaq ki, FİFA ötən ilin sonlarında “Beşiktaş”ın daha bir sabiq futbolçusuna - Viktor Ruisə də 2,5 milyon avro təzminat ödəməli olduğuna qərar vermişdi.