''Dənizlispor''un prezidenti: ''Fənərbaxça'' mənim üçün bitdi''
Türkiyə futbolunun köklü klublarından olan ''Dənizlispor'' artıq uçurumun kənarına gəlib.
Bu komanda bu mövsüm 3-cü liqa, yəni 4-cü divizionda çıxış edir və 4-cü qrupda 20 oyuna topladığı 11 xalla sonuncu pillədə qərarlaşıb. Bu gedişlə ''xoruzlar'' həvəskarlar liqasına yuvarlanacaq. Komandada o qədər ciddi maddi problemlər var ki, hətta bu günlərdə ''Denizlispor''un bazasında qazı da kəsiblər! Çünki qaza olan borc faizlərlə birlikdə artıq 1,9 milyon lirəni ötüb. Qəribə səslənsə də, dənizlilərin bu durumuna ən çox sevinənlər ''Fənərbaxça'' azarkeşləridi.
Türkiyə futbolunun bir qədər stajlı azarkeşləri ''Dənizlispor''un ''Fənərbaxça''nı çempionluqdan etdiyi dönəmi yəqin ki, gözəl xatırlayır. 2005/06-da ''Fənər'' son tura lider kimi daxil olmuşdu və Dənizlidə qalib gələcəyi təqdirdə ardıcıl 3-cü çempionluğunu bayram edəcəkdi. Amma meydan sahiblərinin də elitada qalmaq üçün ən azı 1 xala ehtiyacı var idi. Türkiyə futbolu tarixinə düşən, meydana konfet kağızları atıldığı üçün 16 dəqiqə əlavə vaxt oynanılan və 1:1 bitən görüşdən sonra ''Qalatasaray'' çempion olmuşdu. İndi ''Fənər''lilər məhz həmin matçı xatırlayaraq ''Denizlispor''un ünvanına heç də xoş olmayan ''arzular'' bildiriblər.
Bu arada bu komandanın prezidenti Erhan Ergil son açıqlamasında diqqətçəkən ifadələr işlədib. O, ''Fənər''lilərin sosial şəbəkələrdəki paylaşımlarından sonra artıq bu komandaya azarkeşlik etməyəcəyini bildirib:
''Bu şəhər ilk növbədə başqa klubları dəstəkləməkdən vaz keçməlidi. ''Dənizlispor''u dirçəltməyin ilk yolu məhz burdan başlayır. Mən də etiraf edirəm ki, bu vaxta qədər ikinci komandam ''Fənərbaxça'' idi. Məni tanıyanlar bu kluba necə azarkeşlik etdiyimi bilirdilər. Amma dünəndən etibarən şəxsi mesajlarda ''Dənizlispor'' ilə məzələnən, söyüş və təhqir yazanları çox gördüm. Mənə ən çox təsir edən ''Fənər'' azarkeşlərinin qaz kəsildiyi üçün soyuqda qalan bu uşaqlarla məzələnməsi oldu. Həmin andan etibarən ''Fənərbaxça'' mənim üçün bitdi! O komandanın evimdə olan bütün formalarını atacam. Problem 2006-cı ildən qaynaqlanır. Amma güclü idizsə, çıxıb qalib gələrdiz. Həmin oyunda mən də tribunada idim. 18 yaşında bir gənc idim. Bəli, meydana konfet kağızları atanlardan biri də mən olmuşam. Nə etməli idik? Mübarizə aparmayıb elitanı tərk etməli idik? Artıq hər kəs öz məmləkətinin klubunu dəstəkləməlidi. Mən də bu ideyanın doğru olduğunu düşünürəm. Necə ki, Bursa və Əskişəhərdə hər kəs öz klubunu dəstəkləyir. Bu üzdən o klublar ayaqda qalmağı bacarır. Biz isə bu günlərə düşmüşük''.
ƏLİ
Digər xəbərlər
