Attila Salainin Türkiyə karyerası rəsmən başa çatıb.

"Football-plus.az" xəbər verir ki, Macarıstan yığmasının üzvü karyerasını Almaniyada davam etdirəcək. Belə ki, Salai “Fənərbaxça”dan ayrılaraq bundesliqa təmsilçisi “Hoffenhaym”a transfer olunub. Keçidin detallarına gəlincə, “Fənər” istedadlı mərkəz müdafiəçisini Türkiyə mətbuatının iddia etdiyi kimi 14-15 milyon avroya yox, 12,3 milyon avroya satıb. Üstəlik bu məbləğin 13,5 faizi futbolçunun əvvəlki klubu “Apollon”a çatacaq. Xatırladaq ki, İstanbul nəhəngi 25 yaşlı mərkəz müdafiəçisini 2021-ci ilin yanvarında Limassol təmsilçisindən 2,2 milyon avroya transfer etmişdi. Salai “Fənər”də 117 rəsmi oyuna çıxaraq 7 qol, 4 məhsuldar ötürmə ilə fərqləndi və 1 titul qazandı. Macarıstanlı futbolçunun vida üçün “Fənər”in ev oyunlarını keçirdiyi “Ülkər” stadionunu sonuncu dəfə ziyarət edərkən duyğusal anlar yaşaması diqqətdən qaçmayıb. O, klubun rəsmisi Səlahəttin Baki və idman direktoru Mario Branko ilə vidalaşarkən göz yaşını saxlaya bilməyib. Bundan başqa, Salai sosial şəbəkədə “Fənər” üçün vida mesajı da paylaşıb. İstanbul nəhənginin bu yay həyata keçirdiyi satışlar diqqəti çəkir. “Sarı-lacivərdlilər” Salaiyə qədər Mergim Berişanı 4,5 milyon avroya “Auqsburq”a, Armindo Brumanı 6,5 milyon avroya “Braqa”ya, Arda Güləri 20 milyon avroya “Real”a satmışdı. Yəni komanda cari “transfer pəncərəsi”ndə oyunçu satışından artıq 43,3 milyon avro gəlir əldə edib!

Yeri gəlmişkən, Semih Şəntürkün “Fənərbaxça”da yeni vəzifəsi bəlli olub. O, “Fənər”in U-19 komandasının baş məşqçisi təyin olunub. Bir qədər stajlı futbolsevərlər, yəqin ki, Semihi gözəl xatırlayır. “Sarı-lacivərdlilər”in öz yetirməsi olan Semih uzun illər bu klubda çıxış edib və böyük uğurlar qazanıb. 2007/08-də Türkiyə çempionatının bombardiri olan Şəntürk AÇ-2008-də Türkiyə yığmasının heyətində sərgilədiyi parlaq oyunla da yaddaşlarda iz buraxıb. Semih 2020-dən bəri zatən “Fənərbaxça”nın akademiyasında çalışırdı. Amma o, baş məşqçi kimi işləmirdi və yalnız gənc oyunçuların yetişdirilməsinə cavabdehlik daşıyırdı.