Avropa nəhəngi bu yay heç kimi transfer etməyəcək
Almaniya futbolunun flaqmanı ''Bavariya'' önümüzdəki yay transfer dönəmində çox da fəallıq nümayiş etdirməyəcək.
''Bild'' nəşrinin iddiasına görə Münhen nəhəngi yeni futbolçular almayacaq. Təbii ki, bahalı transferlərdən də vaz keçiləcək. Ancaq baha qiymətə oyunçu satışı reallaşsa, o zaman durum dəyişə bilər. Komandanın idman direktoru Maks Eberl bu mövzuda verdiyi açıqlamada bunları deyib:
''Biz yeni transferlərdən çox baş məşqçi Vensan Kompaninin planlarına daxil olmayan oyunçularla vidalaşmaq barədə düşünəcəyik. Həmin oyunçuları sata bilsək və ya planda olmayan hansısa bir bahalı satış həyata keçirsək, o zaman artıq yeni transferlər barədə düşünməyimiz mümkündü''.
Zatən tarixi boyu bahalı keçidlərə heç vaxt meyl göstərməyən ''rekordmayster'' hazırda əsas diqqəti vacib oyunçularla müqaviləni yeniləməyə yönləndirib. Bu siyasətin nəticəsi kimi artıq Manuel Noyer, Alfonso Devis və Camal Musiala ilə yeni müqavilə imzalanıb. Hazırda Coşua Kimmix və Dayo Upamekano ilə də danışıqlar davam etdirilir.
Bundesliqada inamla turnir cədvəlinə başçılıq edən və bu mövsüm ''gümüş cam''ı özünə qaytaracağı gözlənilən ''Bavariya'' Çempionlar Liqasında da yoluna davam edir.
ƏLİ
Digər xəbərlər
