Mövsümün sonunda müqavilə müddəti başa çatacaq ulduzların sayı heç də az deyil.

''Football-plus.az'' xəbər verir ki, tanınmış ''transfermarkt'' portalı yaydan etibarən azad agent statusu alacaq ən bahalı futbolçuların siyahısını müəyyənləşdirib.

Onu da bildirək ki, bu futbolçuların artıq yanvarın 1-dən etibarən istədikləri klubla danışıqlar aparmağa haqqı var! Siyahıya ''Liverpul''un ulduzları başçılıq edir. Trent-Aleksander Arnold 75 milyon avroluq dəyəri ilə birinci, Məhəmməd Salah 55 milyon avroluq dəyəri ilə ikinci pillədə qərarlaşıb. Arnoldun yayda sərbəst futbolçu kimi ''Real''a yollanacağı gözlənilir.

Hərçənd şayiələrə inansaq, Madrid nəhəngi onu artıq bu qış da transfer edə bilər. Salah isə tez-tez müqavilə məsələsini qabartsa da, ''Liverpul'' hələ də ona yeni təklif irəli sürməyib. Amma ''qırmızılar''ın cari mövsümü inanılmaz səviyyədə keçirən misirli ulduzu heyətdə saxlayacağı gözlənilir. ''Bavariya''nın iki ulduzu - Alfonso Devis ilə Coşua Kimmix 50 milyon avroluq dəyərləri ilə 3-4-cü pillələri bölüşdürür.

Sonrakı pillələrdə bu futbolçular qərarlaşıb: Conatan David (Lill) - 45 milyon avro, Leroy Sane (Bavariya) - 45 milyon avro, Son Hın Min (Tottenhem) - 38 milyon avro, Kevin De Bruyne (Mançester Siti) - 35 milyon avro, Conatan Ta (Bayer-04) - 30 milyon avro, Vircil van Diyk (Liverpul) - 28 milyon avro.

ƏLİ