Yanvarın 31-dən fevralın 1-nə keçən gecə Avropanın əksər ölkələrində qış “transfer pəncərəsi” bağlandı. İlin ilk ayında baş tutan keçidlərdən birinin məbləği futbol tarixinə ən baha 6-cı transfer kimi düşdü. Ötən ay klubların bu plandakı əməliyyatları nəticəsində formalaşan bir sıra cədvəllərə nəzər salaq.

Yanvarın ən baha 20 transferi
“Çelsi” 2023-cü ilin ilk ayında transfer bazarında daha çox fəallıq göstərdi. İngiltərə klubunun rəhbərliyinin sözün həqiqi mənasında bazara bomba saldığını demək olar. Ən baha 20 keçid üzrə bir sıra maraqlı məqamlara göz gəzdirək.
* Ay boyunca “Benfika”nı dilə tutmağa çalışan “Çelsi” Portuqaliya klubundan qiymət və böyük məbləğdə təzminatın ödənilmə variantları planında güzəşt əldə edə bilmədi. Nəticədə yanvarın son günündə Entso Fernandesi qarşı tərəfin şərtləri əsasında sıralarına qatmalı oldu. Dünya çempionu yeni klubuna 121 milyon avroya başa gəldi. İngiltərə futbolunun tarixinə ən bahalı oyunçu kimi düşən Entso 2021-ci ildə “Aston Villa”dan 117,5 milyon avroya “Mançester Siti”yə satılan yarımmüdafiəçi Cek Qrilişin rekordunu yenilədi. DÇ-2022-nin ən yaxşı gənc futbolçusu seçilən xavbek həmçinin futbol tarixinin ən bahalı argentinalı oyunçusu oldu. Fernandes 2016-cı ilin yayında “Napoli”dən 90 milyon avroya “Yuventus”a satılan hücumçu Qonsalo İquaynın rekordunu arxada qoydu. Entsonun futbol tarixinə 6-cı ən bahalı transfer kimi düşdüyünü də bildirək. O, bu planda Neymar (222 milyon avro), Kilian Mbappe (180 milyon), Usman Dembele (140 milyon), Filippe Koutinyo (135 milyon) və Joao Felişdən (127,2 milyon) geri qalır.
* Yanvarın ən baha 20 transferini reallaşdıran klubların ümumi xərci 666,1 milyon avroya bərabərdi.
* Bu transferlərdən 5-i “Çelsi”nin payına düşür. London klubunun sahibi Todd Bouli qışda yeni oyunçular üçün 320 milyon avrodan çox xərc çəkib.
* Ən dəyərli 20 keçiddən 18-ni İngiltərə premyer-liqasında çıxış edən klublar reallaşdırıb. Qalan iki transferi “Marsel” və “Flamenqo” həyata keçirib.
* PSV yanvarda satdığı iki oyunçusuna – Kodi Qakpo ilə Noni Maduekeyə görə 77 milyon avro qazanıb.