PSJ heyətini daha bir yeni futbolçu ilə gücləndirib.

"Football-plus.az" xəbər verir ki, Paris klubu “Ayntraxt”dan Randal Kolo Muanini transfer edib.

Fransa nəhəngi onun üçün 95 milyon avro ödəyib. Randal Frankfurt klubunun tarixinə ən bahalı satış kimi düşüb. 24 yaşlı hücumçu ilə 5 illik müqavilə imzalanıb. Kolo Muani PSJ-də “23” nömrəli formada çıxış edəcək. Fransalı futbolçu “Nant”ın yetirməsidi. “Ayntraxt”a 2022-ci ildə məhz bu klubdan keçmişdi. O, 2022/23 mövsümündə frankfurtluların heyətində bundesliqada 32 oyun keçirib və 15 qol vurmaqla komandanın ən yaxşı bombardiri olub. Randalın bu mövsüm Almaniya çempionatında 2 oyuna 1 qol vurduğunu da xatırladaq.

PSJ-nin yay “transfer pəncərəsi”nin bağlandığı son gündə - sentyabrın 1-də Kolin Daqbanı “Oser”ə göndərdiyini də bildirək. 24 yaşlı müdafiəçi cari mövsümün sonuna qədər bu komandada icarə əsasında çıxış edəcək. Paris klubunun yetirməsi olan Kolin ötən mövsümü bu statusla “Strasbur”da keçirib. O, paytaxt komandasında 77 matçda meydana çıxıb, 1 qol vurub və 6 məhsuldar ötürmə verib.