“Qış fasiləsinə qədər heyətlə bağlı ciddi problemlərlə üzləşdik. Oyunçu çatışmazlığı var idi. Lakin indi bu yöndə problemlər həllini tapıb. “Araz-Naxçıvan”dan iki oyunçu icarəyə götürmüşük. 1-ci liqa klublarından transfer etdiyimiz futzalçılar da var. Hazırda komandada 15 nəfər yer alıb. Hətta bəzi matçlarda meydana buraxmadığımız futzalçılar olur. Düzdü, qış fasiləsindən sonra keçirdiyimiz hər iki oyunda uduzduq. Lakin rəqiblərdən biri “Baku Fire” idi ki, bu komandaya güc gəlmək iqtidarında deyilik. “Şuşa” ilə görüşdə isə əsas oyunçularımız zədəli idi. Özüm son qarşılaşmada komandama yardım edə bilməmişəm. Təəssüf ki, maliyyə ilə bağlı problemlər də davam edir. Sponsorumuz yoxdu. Futzalçılar nəinki maaş, yolpulu belə almır. Sadəcə, özünü yaxşı tərəfdən göstərib “Araz-Naxçıvan”, “Neftçi” və “Baku Fire” kimi komandaların diqqətini çəkmək istəyirlər. Yəni komandadan tramplin kimi istifadə edirlər. İndiyə qədər buna nail olan oyunçular olub. İndi “Neftçi” və “Baku Fire”da çıxış edən bəzi futzalçılar ötən mövsüm bizdə idi. Qarşıdan U-19 millisiylə oyun gəlir. Həmin matçda qələbə qazanacağımıza inanırıq”.