“Montsa”da növbəti məşqçi dəyişikliyi zərurətə çevrilib. Maraqlıdı ki, rəhbərlik iki ay əvvəl istefaya göndərdiyi çalışdırıcını geri qaytarıb.

İtaliya klubunun rəsmi saytının xəbərinə görə, Salvatore Bokketti də uğursuz nəticələrə görə baş məşqçi vəzifəsindən azad olunub. “Montsa” ötən ilin dekabrında təyin olunan italiyalı mütəxəssisin rəhbərliyi altında keçirdiyi 7 oyunda 1 qələbə qazanmış, 6 dəfə uduzmuşdu.
Bokkettinin yerini Alessandro Nesta tutub. İtaliya yığması ilə 2006-cı ildə dünya çempionu olan 48 yaşlı mütəxəssis iki ay əvvəl - dekabrın 23-də uğursuz nəticələrə görə komandadan istefaya göndərilmişdi. Nestanı köhnə-yeni vəzifəsində yenə çətin missiya gözləyir.

O, hazırda A seriyasında 24 oyuna 13 xalla cədvəlin sonuncu - 20-ci pilləsində “möhkəmlənən” “Montsa”nı B seriyasına düşməkdən xilas etməlidi.