24 sarı, 2 qırmızı vərəqə, 4 penalti...

Hesabat turunun intizam tədbirləri baxımından səliqəli alındığını demək olmaz. Elə baş məşqçilər arasında da narazı qalan tapıldı. Kurban Berdıyev komandası hələ ilk yarıda azlıqda qaldığına görə Kauan Martinsi qınadısa, Elmar Baxşıyev “Sumqayıt” – “Araz-Naxçıvan” oyununu idarə edən Cavid Cəlilovu göydən yerə vurdu. Maraqlı məqam odu ki, ötən tur da Qurban Qurbanov adı çəkilən hakimdən kəskin şəkildə narazılıq etmişdi. Görəsən, bütün məşqçilərin Cavid bəydən narazı qalması təsadüfdü, yoxsa idarəçiliyə verilən gerçək qiymət?!

Zirə - Qarabağ, RƏVAN HƏMZƏZADƏ
Rəvan Həmzəzadə ilə köməkçilərinin oyunu qüsursuz idarə etdiyini deyə bilərik. Sürətli və baxımlı arşılaşmada hakimlərin kənar müdaxiləsi görünmədi. Düzdü, bəzi xırda epizodlarda futbolçular Həmzəzadəyə narazılıq bildirirdi. Bunların birində “Zirə” topun “Qarabağ”ın futbolçularından çıxdığına işarə etsə də, yan xətt hakimi autu ağdamlıların atacağına işarə etdi. Digər narazılıq isə Toral Bayramovun sarı vərəqə aldığı epizodla bağlı idi. Amma bunların heç birisi oyunun gözəlliyinə və nəticəsinə kölgə salmadı. Belədə hakimlər briqadasının işini əla qiymətləndirmək mümkündü.

Kəpəz – Sabah, FƏRİD HACIYEV
Oyun gərgin və barışmaz mübarizə şəraitində keçdi. 4-cü dəqiqədə Xəyal Əliyevin qapıya yönəltdiyi top Rauf Hüseynlinin əlinə dəydi. Referi “nöqtə”ni göstərdi. 44-cü dəqiqədə Mikels üç rəqibdən sıyrılıb Şafrankoya ötürmə verdi. Slovakiyalı topu komanda yoldaşına qaytarsa da, Mikels “Kəpəz”in cərimə meydançasında yerdə qaldı. Fərid bəy yenə “nöqtə”ni göstərdi, ancaq VAR-a baxandan sonra qərarını dəyişdi. 58-ci dəqiqədə Noqeyra topu ələ keçirmək üçün pressinq edən Ardazişvilinin dabanına təmas edərək futbolçunu yerdə qoydu. Referi öncə oyunu davam etdirsə də, sonra VAR kamerasına yaxınlaşaraq epizodu yaxından izlədi. Və belədə həm “nöqtə”ni göstərdi, həm də Noqeyranı ikinci “sarı” ilə meydandan qovdu.

Turan Tovuz – Səbail, TURAL QURBANOV
Tovuz publikasının önündə sərt qərarlardan qətiyyən çəkinmədi. Madi Queta əks-hücuma çıxarkən Kauan Martins onun qarşısını kobudluqla aldı və meydandan qovuldu. Üstəlik referi qərarına edən etiraz edən Ruslan Abışova qırmızı, Yunis Hüseynova sarı vərəqə göstərdi. Oyunsonrası mətbuat konfransında Kurban Berdıyev idarəçilikdən narazılıq etməyibsə, deməli, hər şey qaydasındadı.

Neftçi – Şamaxı, RƏŞAD ƏHMƏDOV
“Şamaxı” nə qədər inadkar oyun sərgiləsə də, məğlubiyyətdən yaxa qurtara bilmədi. Və burda hansısa hakim ədalətsizliyindən söhbət gedə bilməz. Baxmayaraq ki, referi meydan sahiblərinə 1, qonaqlara 5 sarı vərəqə göstərdi. Axı şamaxılılar xüsusilə 2-ci hissədə yetərincə kobudluq etdi. Onlar günahı özündə axtarmalıdı. Rəşad bəyin idarəçiliyində qüsur axtarmağa dəyməz.

Sumqayıt – Araz-Naxçıvan, CAVİD CƏLİLOV
Elmar Baxşıyevin “80-ci dəqiqədə “Sumqayıt”ın qapısına penalti təyin edilməliydi” sözünə görə həmin vaxt yaşananları dəfələrlə incələməli oldum. Burda Slavik Alxasov iki dəfə bəxtini sınasa da, birincidə Mehdi Cənnətov, ikincidə Rövlan Muradov səddini keçə bilmir. Hər iki futbolçu məhz topa müdaxilə edərək təhlükəni sovuşdurur. Həm “kimyaçılar”, həm də naxçıvanlılar oyunboyu xeyli qayda pozuntusuna yol verdi və ədalət təmsilçisindən layiqli cəza aldı. Lakin Elmar bəyin “biz sarı vərəqə ilə üzləşirik, bəs rəqib?” ifadəsi də həqiqətdən uzaqdı. Axı hakim bu görüşdə 7 sarı vərəqə göstərib ki, üçü meydan sahiblərinin, dördü qonaqların payına düşüb. “Gənclik şəhəri”nin təmsilçisi daha çox cəza almalıydı? Yox, biz Cavid Cəlilovun tərəfkeşlik etdiyini düşünə bilmərik.