Uzun müddətdi ABŞ-da yaşayan və ''İnter Mayami''nin prezidenti olan ötənlərin məhşur futbolçusu Devid Bekhem Rusiyanın Ukraynaya silahlı təcavüzünə diqqəti yönəltmək üçün maraqlı addım atıb.

''Mançester Yunayted'' və İngiltərə yığmasının sabiq üzvü özünün 72 milyona yaxın izləyicisi olan ''instaqram'' səhifəsini bir günlüyə Xarkovdan olan bir xanım həkimə verib! Söhbət Xarkov Perinatal Mərkəzinin müdürü İrina Kondratovadan gedir. 28 illik həkim təcrübəsi olan bu xanım hamilə qadınlara sağlam doğuş etmək üçün yardım edir. O, həm də uşaq anestezioloqudu. Kondratova müharibə başladıqdan bu yana məcburən bomba sığınacağına yerləşdiklərini deyib və bu çətin şəraitdə orda yeni doğulan körpələrin həyatda qalması üçün görülən işlərdən danışıb. Dünəndən bu yana artıq Bekhemin ''instaqram''ının hekayə bölümündə bununla bağlı İrina tərəfindən 15 dənə şəkil və video paylaşılıb! Eyni zamanda UNİCEF-in yaxşı niyyət elçisi olan Bekhem daha öncə də sosial şəbəkələrdə dəfələrlə Ukraynada yaşananlara dair paylaşımlar edib.