Qətərdə noyabrın 20-də start götürəcək və böyük səbirsizliklə gözlənilən dünya çempionatına hazırlıq tam sürətlə davam edir.

Mundial ilə bağlı, demək olar, hər gün müxtəlif tədbirlər keçirilir. Hazırda Fatih Terim də Qətərdədi. Ünlü türkiyəli mütəxəssis oyunların keçiriləcəyi stadionları ziyarət edib. Onun başqa yerləri ziyarət edəcəyi də gözlənilir. Bu arada srağagün mundiala həsr olunmuş tədbirdə maraqlı olay yaşanıb. Tədbirdə trabzonlu iş adamları ilə yanaşı, DÇ-nin əsas reklam simalarından biri olan, dünyaca ünlü sabiq ingiltərəli futbolçu Devid Bekhem də iştirak edib. Burda Qətərdə fəaliyyət göstərən bir şirkətin türkiyəli vitse-prezidenti Kaner Eyupoğlu, eləcə də Qətərdə türk icmasının sədri vəzifəsini daşıyan Bora Bayır Bekehmlə görüşərək ona üzərində “61” rəqəmi qeyd olunan “Trabzonspor” formasını hədiyyə ediblər. Formanı böyük məmnuniyyətlə qəbul edən Bekhem Eyupoğlu və Bayır ilə şəkil çəkdirib. İngiltərəli superstarın “Trabzonspor” haqda nəsə bilirsənmi” sualına “bəli, bilirəm. Türkiyənin son çempionudu” cavabını verməsi diqqəti çəkib.