Avropa Liqasının əsas mərhələsinin 7-ci turunda ''Qalatasaray'' autsayder Kiyev ''Dinamo''sunu qəbul etdi.

''Football-plus.az'' xəbər verir ki, Ukraynadakı vəziyyət üzündən əvvəlki gücündən çox uzaq olan ''Dinamo'' artıq pley-off şansını itirmişdi. Komanda keçirdiyi 6 oyunun hamısında məğlub olmuş və bu qarşılaşmalarda cəmi 1 qol vurmuşdu. Ona görə də Türkiyə çempionu aşkar favorit sayılırdı.

Oyunun əvvəlləri Okan Burukun komandası üçün uğurlu alındı. Mərkəz müdafiəçiləri - Sançes və Əbdülkərim Bardakcının qolları sayəsində komanda iki topluq üstünlük yaxaladı. Maraqlıdı ki, bu cütlük bu mövsüm artıq 3-cü dəfə eyni oyunda fərqlənməyi bacardı! Sançes ilə Bardakcı daha öncə superliqada ''Çaykur Rizəspor'' və kubokda ''İstanbul BŞ''yə qarşı oyunlarda da qol sevinci yaşamışdı. Aleksandr Şovkovskinin çalışdırdığı ''Dinamo'' fasilə ərəfəsində qollardan birinin əvəzini çıxsa da, ikinci hissənin əvvəllərində penaltidən fərqlənən Osimhen yenidən fərqi iki topa çatdırdı. Amma heç bir ciddi hədəfi olmayan Kiyev klubu qalan müddətdə sərgilədiyi əzmkarlıqla alqış qazandı. Təcrübəli Andrey Yarmolenko səhnəyə çıxaraq dubl etdi (3:3).

Beləliklə, ''Cim-Bom'' AL-in əsas mərhələsində ilk dəfə evdə xal itirdi. Maraqlıdı ki, ''Qalatasaray'' ardıcıl 11-ci rəsmi oyunda qol buraxmasına baxmayaraq komandanın məğlubiyyətsiz seriyası 25 oyuna yüksəldi (17 qələbə, 8 heç-heçə). Okan Buruk hələ də müdafiədəki zəif oyuna çarə tapa bilmir. ''Sarı-qırmızılar'' bu mövsüm keçirdikləri 30 rəsmi oyunun cəmi 4-də (!) qapını toxunulmaz saxlamağı bacarıblar.

Daha bir diqqətçəkən məqam odu ki, ''Qalatasaray'' tarixi ərzində Ukrayna təmsilçisinə qarşı keçirdiyi 4-cü oyunda da qələbəyə həsrət qaldı (3 heç-heçə, 1 məğlubiyyət). 7-ci turu 13 xalla tamamlayan ''Qalatasaray''ın ilk ''8-lik''də yer alıb-almayacağına son turda aydınlıq gələcək.

Qeyd edək ki, komanda son turda səfərdə ''Ayaks''la qarşılaşacaq.

ƏLİ