“FİF olaraq, bölgələrdəki futbol klublarında dayanıqlılığın təmin edilməsi üçün maliyyə kanalları formalaşdırmağa çalışırıq. Təbii ki, bu nə qədər çox olarsa, bir o qədər sabitlik olar... “Lerik” kimi öz stadionu olmayan klublarda bunu etmək çox çətindi. Çünki ilkin maliyyə formalaşdırılması oyun günü gəlirləri və auditoriyanın toplanması nəticəsində əldə olunan gəlirlər hesabına mümkündü. Bu səbəbdən maliyyə dəstəyi cəlb etmək üçün hələ ki yalnız yerli sahibkarlarla görüşlər keçirmişik. Bu vaxta qədər yalnız bir sahibkarın - Bəxtiyar Əliyevin müsbət cavab verməsinə baxmayaraq, İcra Hakimiyyəti başçısının da dəstəyi ilə növbəti görüşləri planlayırıq. Paralel şəkildə yaxın zamanda geniş ictimaiyyəti əhatə edən bir layihəyə start verəcəyik. Əsas çətinlik isə bu prosesə dəstək olacaq insanların azlığı, “networking”imizin zəif olmasıdı. Famil (“Lerik”in prezidenti Famil Məmmədov nəzərdə tutulur – red.), demək olar ki, tək qalıb. Bunun üçün əslən Lerikdən olan tanıdığınız məşhurlar, ətrafı və ya sosial media əhatəsi geniş şəxslər, media nümayəndələri, ümumiyyətlə, bu prosesə könüllü dəstək ola biləcək sosial məsuliyyətli şəxsləri bizimlə əlaqələndirməyinizi xahiş edirəm. “Lerik”i birlikdə xilas edək. Vəziyyət həqiqətən kritikdi. Bu, demək olar ki, son cəhddi”.

“Əvvəla diqqətiniz üçün çox təşəkkür edirəm. Mövzu ilə bağlı FİF-lə müntəzəm əlaqədəyik. Çalışırıq ki, yollar tapaq. Kampaniyalar keçirilir, müəyyən layihələr çərçivəsində sahibkarlarla görüşlər baş tutur. Bu işləri icra edirik ki, klubumuz maliyyələşsin. Təəssüf ki, hələ sponsor tapmamışıq, hansısa maddi dəstək yoxdu. Klubun fəaliyyətini dayandırıb-dayandırmayacağı haqda konkret nəsə demək mümkün deyil. Vəziyyətdən xilas olmağa çalışırıq. Hər şey ola bilər. Ruhdan düşmək istəmirik. Futbolçularımız bizimlədi. Bəziləri pulsuz oynayır, bəziləri də minimal əməkhaqqıyla... İndi fasilədi. Belə anlarda maddi problem o qədər də hiss olunmur. Mövsüm ərzində, demək olar ki, bütün oyunlara məşq etmədən çıxdıq. Ona görə ki, başqa rayonlarda qalan oyunçuların məşqlərə gəlib-getməsi üçün müəyyən maddi vəsait tələb olunur. Oyun günlərində daha çox pul lazımdı. Oyunçularımızın əksəriyyəti başqa işlərdə də çalışır. Bilindiyi kimi, hamısı yerlidi və bizi başa düşürlər. Mövsümün birinci yarısında uğursuz çıxış etdik. Turnir cədvəlindəki yerimiz yaxşı deyil. İnşallah, qalan oyunlarda daha yaxşısını etməyə çalışacağıq. Yanvarın sonunda məşqlərə başlamaq istəyirik. Məlumdu ki, oyunçulara çox maaş vermək alınmır. Sevindirici haldı ki, futbolçularımız komandadan ayrılmaq istəmir. Bəlkə bir neçə transfer də etdik. Tezliklə bəzi oyunçularla danışıqlara başlamaq istəyirik. Sahibkarlarla, dövlət qurumlarıyla görüşlərimiz hələ ki fayda verməyib. Amma bu problemdən qurtulacağımıza inanıram. İndiki halda xüsusi yenilik olmasa da... İnşallah, vəziyyət düzəlməsə belə, “Lerik”in fəaliyyətini dayandırmaması üçün əlimizdən gələni edəcəyik. AFFA-nın ayırdığı məbləğ və öz hesabıma komandanı ayaqda saxlamağa çalışacam”.