1-ci liqa təmsilçisi “Zaqatala” ilə bağlı yeniliklər var. 9-cu turda səfərdə “Mingəçevir”i 1:0 hesabıyla məğlub edən “yaşıl-sarılar”la bağlı həm mənfi, həm də müsbət informasiya əldə etmişik. Əvvəlcə yaxşı xəbərdən başlayaq.

Futbolun İnkişaf Fondu klubun maliyyə dayaqlarını gücləndirmək üçün çalışmalara başlayıb. Qurumun şəhərdə və rayonda fəaliyyət göstərən xırda şirkətlərlə danışıqları nəticə verib. FİF “Zaqatala” üçün 20 şirkətlə razılıq əldə edib. Həmin şirkətlər komandaya aylıq 200-500 manat aralığında maliyyə ayıracaq. Bir sözlə, klub ay ərzində dövlətin ayırdığı 30 mindən əlavə 5-6 manat da əldə edəcək. Futbolun İnkişaf Fondu “Zaqatala” üçün daha çox pul ayrılması üçün böyük şirkətlərlə də danışıqlara başlayacaq.

Klubla bağlı digər xəbər bir qədər üzücüdü. “Zaqatala” Olimpiya İdman Kompleksinin aylıq ödənişini edə bilmir. Klub Gənclər və İdman Nazirliyinə ötən mövsümdən bu aya kimi icarə haqqı verməyib. Bu səbəbdən də “Zaqatala” oyunlarını keçirməyə yer tapmaya bilər. Klubun arenaya ümumilikdə 15 min manatdan çox borcu var. Klub rəhbərliyi həm AGİN, həm də AFFA ilə bu yöndə danışıqlar aparır. “Mingəçevir”lə səfər matçından əvvəlki günə kimi stadiona su verilməyib. Bir sözlə, “Zaqatala”nın olduqca böyük problemi var. Bu məsələ həll olunmasa, klub oynamağa stadion tapa bilməyəcək.
Maraq üçün bildirək ki, iki mövsüm öncə də klub eyni problemlə üzləşib. Həmin vaxt “Qarabağ”ın çalışdırıcısı Qurban Qurbanov öz cibindən bu borcu bağlayıb. Hazırkı durumdan çıxış yolu axtaran “Zaqatala” rəhbərliyi şəhərin iş adamları ilə borcun ödənilməsi istiqamətində danışıqlara başlayacaq.

İLKİN SULTANLI