“Lerik” “Qusar”la oyunda meydana çıxacaqmı? – ikinci texniki məğlubiyyət təhlükəsi...
“Lerik”in maliyyə problemiylə üzləşdiyini yazmışıq. Hətta cənub təmsilçisi yolpulu tapa bilmədiyindən 2-ci liqanın 7-ci turunda “Şəfa”nın meydanında keçirilməli olan matça yollana bilməyib və bu üzdən texniki məğlubiyyətlə üzləşib. Həmçinin AFFA İntizam Komitəsi klubu 300 manat cərimələyib.
Bilindiyi kimi, ikinci texniki məğlubiyyət “Lerik”in çempionatdan kənarlaşdırılmasıyla nəticələnəcək. Və kollektiv bu gün 8-ci turun matçında “Qusar”ı qəbul etməlidi. Klub prezidenti Famil Məmmədov saytımıza açıqlamasında futbolçuların ev oyununda da meydana çıxa bilməmək ehtimalının olduğunu deyib.
Görəsən, bu yöndə son durum necədi? “Lerik” oyunçularını meydana çıxmağa razı salıbmı?
Bu suallarla yenidən Famil bəyə müraciət etdik. Onun “Football-plus.az”a cavabı:
“Komanda ilə vəziyyəti müzakirə etdik. Futbolçular bugünkü oyunda meydana çıxacaqlarını bildirdilər. Amma ümumi vəziyyətdə dəyişiklik yoxdu. Stadion problemi yaşadığımıza görə ev oyunlarımızı Lənkəranda keçiririk. Bu üzdən azarkeş dəstəyi də istənilən səviyyədə deyil. Problem ictimailəşdikdən sonra hansısa şirkət və ya iş adamı da maddi yardım etmək məqsədilə bizə müraciət etməyib”.
Funksioner yuxarıda bəhs etdiyimiz 300 manat cərimə haqda fikirlərini də bizimlə bölüşdü:
“Əsasnamənin tələblərinə görə meydana çıxmayan komanda texniki məğlubiyyətlə yanaşı, 300 manat cərimə ilə üzləşir. Buna etirazımız yoxdu. Yolumuza davam edə bilsək, 2-ci liqa klublarına ayrılan məbləğ vasitəsilə həmin cəriməni ödəməyə çalışacağıq”.
Qeyd edək ki, “Lerik” – “Qusar” oyunu saat 14.00-da başlayacaq.
KƏNAN BAHADIR
Digər xəbərlər
