''Qalatasaray'' bu göstəricidə Avropada hamıdan öndədi!

Əla mövsüm keçirən və növbəti çempionluğuna doğru irəliləyən ''Qalatasaray'' hazırda 22 rəsmi oyunluq məğlubiyyətsiz seriyaya malikdi.

''Football-plus.az'' xəbər verir ki, İstanbul nəhəngi bu müddətdə 16 qələbə qazanıbsa, 6 görüşdən bərabərliklə ayrılıb. Avropanın ən güclü 10 çempionatına nəzər salsaq, bu, hazırda davam edən ən böyük məğlubiyyətsiz seriyadı!

Bu yaxınlara qədər bu göstəricidə lider ''Liverpul'' idi. Premyer-liqanın 4-cü turunda evdə ''Nottingem Forest''ə uduzduqdan sonra mersisaydlılar ardıcıl 24 rəsmi oyunda məğlub olmadılar. Amma bu seriya çərşənbə günü liqa kubokunun yarımfinalının ilk matçında səfərdə ''Tottenhem''lə oyunda qırıldı (0:1). Ona görə də liderlik ''Qalatasaray''a keçdi.

Son 19 rəsmi oyunda uduzmayan Fransa təmsilçisi ''Lill'' 2-ci, son 15 rəsmi oyunda uduzmayan Belçika təmsilçisi ''Brügge'' isə 3-cü pillədə qərarlaşıb. ''Qalatasaray'' qarşıdakı 3 rəsmi oyunda da uduzmayacağı təqdirdə ''Liverpul''u da geridə qoyacaq və bu mövsüm Avropanın aparıcı çempionatlarında ən uzun məğlubiyyətsiz seriyaya malik olan komandaya çevriləcək. ''Cim-Bom'' növbəti oyununu yanvarın 12-də superliqanın 19-cu turu çərçivəsində səfərdə ''İstanbul BŞ''yə qarşı keçirəcək.

Qeyd edək ki, Türkiyə çempionu son məğlubiyyətini avqustun 27-də Çempionlar Liqasının təsnifat mərhələsinin ''Yanq Boyz''a qarşı cavab oyununda (0:1) yaşayıb.

ƏLİ