''Qalatasaray'' dünən Türkiyə çempionatının 10-cu turu çərçivəsində Kayseriyə səfər etmişdi.

Düşünmək olardı ki, yaxşıca istirahət edən İstanbul nəhəngi həm heyət, həm də büdcə baxımından bir baş üstələdiyi rəqibi məğlub edəcək. Yığma fasiləsi və ötən həftə oyununun olmaması üzündən ''Cim-Bom'' sentyabrın 24-dən bu yana yalnız bir rəsmi görüş keçirmişdi. Amma komanda dünənki qarşılaşmada çox inamsız təsir bağışlayaraq 1:2 hesablı məğlubiyyətlə üzləşdi.

''Aslan'' matçboyu 166 dəfə top itkisinə yol verərək bu göstəricidə mövsümün antirekordunu yenilədi. Baş məşqçi Okan Buruk hətta 2-ci buraxılan qoldan sonra gödəkçəsini çıxarıb yerə atdı. 6 oyunluq məğlubiyyətsiz seriyası qırılan ''Qalatasaray'' bu mövsüm ilk dəfə səfərdə uduzdu. Komanda keçirdiyi 9 oyuna yalnız 17 xal toplayıb. Xalını 16-ya yüksəldən ''Kayserispor'' isə ardıcıl 3-cü oyunda ''Qalatasaray''a məğlub olmaması ilə diqqət çəkdi. Bu komanda ötən mövsüm də güclü rəqibini evdə yenmiş (3:0), səfərdə isə bərabərə qalmışdı (1:1).