“Heyəti gücləndirməklə bağlı planlarımız var. “Kəpəz”də maliyyə problemi yoxdu. Hər şey qaydasındadı və öz axarı ilə gedir. Bu gün durumumuz bəzi premyer-liqa komandalarıyla müqayisədə daha yaxşıdı” – bu sözləri “Futbol+”ə müsahibəsində “sarı-göylər”in baş məşqçisi Azər Bağırov deyib.

Yəqin ki, cümlələrdə “Kəpəz” sözü işlənməsə, əksəriyyəti söhbətin “Qarabağ”dan, “Neftçi”dən, “Sabah”dan getdiyini düşünərdi. Axı yalnız bu komandaların maliyyə məsələləriylə bağlı cüzi də olsa, problemi yoxdu. Gəl ki, Azər bəy kor Həsənlə kar Fatmaya belə bəlli olan çatışmazlığı ört-basdır etməyə çalışır!

Belə deyilsə, Lassana Ndiaye və Viktor Braqa ilə yolları ayırmaq istəyən gəncəlilər bunu niyə bacarmır? Bəli-bəli, xəbər verdiyimiz kimi, baş məşqçi bu legionerləri kollektivdə görmək istəmir. Lakin onlar tələb etdikləri kompensasiya məbləğinin hər quruşunu cibinə qoymadan “Kəpəz”dən ayrılmaq niyyətində deyil. Məhz bu məsələ komandanın transfer çalışmalarına start verməsinə mane olur.

Təbii ki, problemlər bununla bitmir. Bağırovun böyük ümidlərlə komandaya götürdüyü Orxan Əliyevin “Turan Tovuz”un “yağlı” təklifinə “yox” deyə bilməməsi işləri lap çətinə salıb. Böyük ehtimalla, Turan Manafov da yaxınlarda Gəncəni tərk edəcək. O başqa məsələ ki, Turan legioner həyatı yaşamaq niyyətindədi.

Qısası, Azər Bağırovun “Kəpəz”i gücləndirmək və premyer-liqada saxlamaq hədəfi çətin görünür...

KƏNAN BAHADIR