“Kəpəz” qış fasiləsinə 9-cu pillədə yollandı. Qalan komandalar kimi, Azər Bağırovun yetirmələri də mövsümün ikinci yarısına hazırlaşır.

Bəllidi ki, “sarı-göylər” 10-cu sırada olan “Səbail”lə aradakı xal fərqini artırmaq, premyer-liqada qalmaq üçün ciddi işlər görməlidi. Yoxsa bu böyük şəhərin təmsilçisi növbəti dəfə aşağı dəstəyə yuvarlanacaq.

“Kəpəz”in baş məşqçisi Azər Bağırovla bəzi məsələlər ətrafında söhbətləşdik.

- Komanda cari mövsümün sonunda 1-ci liqaya yuvarlana bilər. Bunun qarşısını almaq üçün hansı addımlar atılır?
- “Kəpəz” premyer-liqadadı. Son oyunların nəticələri və axarı onu göstərdi ki, komandamız yerini qoruyacaq. İnşallah, hər şey yaxşı olacaq.

- “Kəpəz” həm də büdcə problemi yaşayır. Bu çatışmazlıqı nəzərə alsaq, güclənmək üçün hansı planlar cızılıb?
- Heyəti gücləndirməklə bağlı planlarımız var. “Kəpəz”də maliyyə problemi yoxdu. Hər şey qaydasındadı və öz axarı ilə gedir. Bu gün durumumuz bəzi premyer-liqa komandalarıyla müqayisədə daha yaxşıdı.

- Hansı yerli və legioner futbolçular toplanışa hələ də qatılmayıb?
- Bu gün artıq bütün futbolçular qatılıb. Komandamız bir yerdədi. İş gedir, axtarışlarımız davam edir. Yaxın zamanlarda transferlərimiz olacaq.

- Redon Mihana, Viktor Braqa və Lassana Ndiaye ilə yollarınızı ayırmaq planınız var. Bizdə olan bilgiyə görə, Mihana ilə yolları ayırmısız, sadəcə, hələ ictimaiyyətə açıqlamamısız. Bu xəbər doğrudumu?
- Klubun rəsmi səhifəsini izləmək lazımdı. Cavablar orada olur. Az qala hər gün kiminsə gedib-gəlməsi ilə bağlı informasiyalar yayılır. Bu da klubun imicinə ziyandı. Rəsmi xəbərlər çıxandan sonra nələrsə demək olar.

- Digər futbolçularla yolları ayırmaqda niyə yubanırsız? Təzminat istəyirlər, yoxsa onların yerini dolduracaq futbolçular alandan sonramı göndərmək istəyirsiz? Legionerlərlə bağlı hansı addımlar atılır? Bizdə olan bilgiyə görə, əsasən nigeriyalı futbolçularla maraqlanırsınız. Bu nə dərəcədə doğrudu? Hansı mövqelərə transfer edəcəksiz?
- Maraqlandığımız futbolçular var. Avropadan, Asiyadan da var, yalnız Nigeriyadan deyil. Bütün yerlərdən maraqlanırıq. Yaxın zamanda transferlərdən xəbərdar olacağıq.

- Orxan Əliyevlə Turan Manafovun münasibətləri yaxşıdı. Orxanın gedişi Turanın da komandadan ayrılmasına səbəb ola bilərmi? Ona da təkliflər varmı?
- Orxanın əksər komanda yoldaşları ilə arası yaxşıdı. Kimin gedəcəyi, kimin gələcəyi haqda informasiyalar doğru deyil. Turan bu gün komandadı və məşqlərdə iştirak edir.

- Ev oyunlarını Tovuzda keçirirsiz və az azarkeş gəlir. Ev oyunları üçün stadionu dəyişmək mümkündümü?
- Azarkeşlərin az və ya çox gəlməsi baş məşqçinin səlahiyyətində olmayan durumdu. İnanıram ki, oyunlarımız daha da yaxşılaşandan sonra azarkeşlərimizin sayı artacaq. Bütün “Kəpəz” azarkeşlərinə minnətdaram, daim komandanın yanındadılar və dəstəkləyirlər.

- Premyer-liqadan düşmək təhlükəsi ilə üz-üzəsiz. Gəncədən uzaq düşməməyə çalışırsız. Tovuzla Gəncə arasında məsafənin az olmasına baxmayaraq, tribunada, demək olar ki, yalnız fanklubu görürük.
- Şükürlər olsun ki, bu gün komanda 9-cu yerdədi. Qarşıdan gələn oyunlarda azarkeşlər komandamızı dəstəkləyəcək. Bu günə qədər necə yanımızda olublarsa, yenə də inanıram ki, olacaqlar. Bütün bu prosesləri hamımız birlikdə geridə qoyacağıq.

ƏSƏD SEYİDOV