La Liqada 12-ci turun təxirə salınmış oyununda ''Real'' ''Valensiya''nın qonağı oldu.

''Football-plus.az'' xəbər verir ki, son illərdə Madrid nəhəngi üçün bu rəqiblə səfər matçları çətin və qalmaqallı keçirdi. Ötən mövsümkü oyun yerli fanatlarla Vinisius arasındakı qalmaqalla yadda qalmış, Bellingem son anlarda qırmızı vərəqə almış və yekunda 2:2-lik bərabərlik qeydə alınmışdı. 2022/23-də isə ''Real'' ''Mestalya''da ümumiyyətlə qola və xala həsrət qalmışdı (0:1). Elə bu dəfəki qarşılaşma da gərgin və çətin keçdi.

Baxmayaraq ki, çox zəif mövsüm keçirən ''Valensiya'' tura sonuncu pillədə daxil olmuşdu. Meydan sahibləri fasiləyə Uqo Duronun 27-ci dəqiqədə vurduğu qolla 1:0 üstün yollandılar. İkinci hissədə Karlo Ançelotti komandası böyük şanssızlıqlar yaşadı. Bellingem penaltidən yararlana bilmədisə, Mbappenin qolu kiçik ofsayd üzündən qeydə alınmadı. Bütün bunlar azmış kimi Vinisius 79-cu dəqiqədə qırmızı vərəqə aldı.

Oyunboyu yerli fanatlar tərəfindən fitə basıldığı üçün gərgin görünən braziliyalı ulduz qapıçı Dimitrievskinin təxribatına uyaraq onun sifətinə yüngül zərbə endirdi. VAR-ın müdaxiləsindən sonra ''sambaçı'' çox əsəbi şəkildə vaxtından tez paltardəyişmə otağına yollanmalı oldu. Amma inadkar ''Real'' yenə də təslim olmadı. 85-ci dəqiqədə qocalmaq bilməyən Modriç fərqlənməklə mövsümdə ilk qolunu vurdu.

Son anlarda isə Bellingem ''Valensiya''nın müdafiəçisinin kobud səhvini bağışlamadı. Beləliklə, xalını 43-ə yüksəldən ''Kral klubu'' liderliyi ələ keçirdi. Amma ikinci pillədə qərarlaşan və aktivində 41 xal olan ''Atletiko'' bir oyun az keçirib.

Yeri gəlmişkən, ''Real'' XXI əsrdə ilk dəfə La Liqada həm hesabda geridə olduğu, həm də azlıqda qaldığı bir qarşılaşmada qələbə qazandı. Bu hal sonuncu dəfə 1999-un noyabrında ''Rayo Valyekano'' ilə səfər oyununda yaşanmışdı. Həmin vaxt Con Toşakın çalışdırdığı komanda fasiləyə 2 top fərqi ilə geridə yollanmışdı.

İkinci hissədə Fernando Morientes qollardan birini əvəzini çıxsa da, çox keçmədən hakimə etiraza görə qırmızı vərəqə almışdı. Amma ''Real'' qalan müddətdə Raul və Fernando Hyerronun qolları ilə 3:2-lik qələbə qazanmışdı.

ƏLİ