Dünən La Liqanın 27-ci turunda ''Real'' ''Valensiya''nın qonağı oldu.

“Football-plus.az” xəbər verir ki, son illərdə ''Mestalya'' səfərləri bir qayda olaraq ''Kral klubu'' üçün çətin keçirdi. Elə bu dəfəki oyun da istisna olmadı. Meydan sahibləri ilk yarının ortalarında Duro və Yaremçukun qolları ilə 2 topluq üstünlük yaxaladı. Qonaqların heyətində isə Vinisius ön plana çıxdı. Ötən mövsüm məhz bu arenada irqçi təhqirlərə məruz qalması ilə uzun müddət gündəmi zəbt edən braziliyalı vinger bu dəfə ''Valensiya'' fanatlarının cavabını qollarla verdi. O, əvvəlcə fasilə ərəfəsində, sonra 76-cı dəqiqədə fərqlənməklə hesabı 2:2 etdi. Oyunun sonluğu isə tarixi bir qalmaqalla müşahidə olundu. Əsas vaxta əlavə olunmuş 9-cu dəqiqədə ''Real''ın sağ cinahdan hücumu zamanı Braim Diasın aşamasından sonra Bellingem başla topu tora göndərdi. Amma hakim Xesus Xil Mansano düz asmadan öncə qəribə şəkildə fitini səsləndirərək oyunu bitirdi. Bu üzdən qol qeydə alınmadı. Təbii ki, fitdən sonra ''Real''ın üzvləri hakimin ətrafına toplaşaraq ona ciddi şəkildə etiraz etdilər. Bellingem etirazı sərt formada etdiyi üçün qırmızı vərəqə aldı! Oyundan sonra ''Real'' cəbhəsi ciddi narazılığını dilə gətirdi. Karlo Ançelotti daha öncə məşqçilik karyerasında belə bir şey görmədiyini dedisə, Çuameni bunu rüsvayçılıq adlandırdı. İspaniya mətbuatının yazdığına görə ''Real'' rəhbərliyi Bellingemin qırmızı vərəqəsinin ləğvi üçün etiraz edəcək. Amma digər tərəfdən Bellingemin təhqiramiz ifadə işlətdiyi üçün 2-3 oyunluq cəza alacağı deyilir.

ƏLİ