''Fənərbaxça''da bir neçə il ərzində heç kimə tanış olmayan futbolçudan əsil ulduza çevrilən Fərdi Kadıoğlu ilə bağlı transfer xəbərləri səngimək bilmir.

Daha öncə iki dəfə İstanbul nəhənginin ''qapısını döyən'' premyer-liqa təmsilçisi ''Brayton'' bu dəfə bonuslarla birlikdə 35 milyon avroluq təklif irəli sürüb! Maraqlıdı ki, transfer dönəminin əvvəlində ''Fənər'' rəhbərliyi limit kimi məhz 35 milyon avro müəyyənləşdirmişdi. Yəni bütün təklifləri geri çevirən rəhbərlik bu məbləğə Kadıoğlunu satmağa razı idi. Amma Türkiyə mətbuatının yazdığına inansaq, rəhbərliyin fikri dəyişib. ''Fənər'' artıq bu məbləğə də 24 yaşlı cinah oyunçusunu satmaq istəmir.

Ən qısa müddətdə yönəticilərlə Fərdinin meneceri arasında önəmli bir görüş baş tutacaq. ''Fənərbaxça'' futbolçuya yeni beşillik müqavilə və maaşının artırılmasını təklif edəcək. Çünki Joze Mourinyo da birmənalı şəkildə bu istedadlı futbolçunun komandada qalmasını tələb edir.

Hər şey futbolçunun öz qərarından asılı olacaq. İngiltərədən bu qədər çox marağın olması Fərdinin də psixoloji durumuna təsir edib. O artıq İngiltərəyə yollanmağın əleyhinə deyil. ''Brayton''dan başqa ''Mançester Yunayted'' də Türkiyə yığmasının üzvünə ciddi maraq göstərir. Amma manikunianların təklifi 35 milyon avrodan azdı.

2018-ci ildən ''Fənərbaxça''nın şərəfini qoruyan Fərdi Kadıoğlu indiyə qədər 202 rəsmi oyunda 18 qol, 22 məhsuldar ötürmə ilə fərqlənib.

ƏLİ