18-ci turun oyunlarından sonra premyer-liqada ilk yarıya yekun vuruldu.

İkinci dövrənin sonuncu turunda azarkeşlər 3 qələbəyə şahidlik etdi, iki oyunda qalib müəyyənləşmədi, məhsuldarlıq yenə də yetərincə aşağı oldu. Komandalar qış fasiləsinə yollandığından ilin son matçı hər kəs üçün vacib əhəmiyyət daşıyırdı. Bögələrdə sürpriz, paytaxda gözlənilən nəticə qeydə alındısa, “Sabah” gərgin Şamaxı səfərindən üzgün qayıtdı.

“Kəpəz” – “Sumqayıt” matçında azarkeşlər qol görmədi. Tərəfərin səyinə baxmayaraq, 90 dəqiqə qolsuz başa çatdı. Hər iki hissə “Kəpəz”in dominantlığı şəraitində keçsə də, “Sumqayıt” qapısını toxunulmaz saxlamağı bacardı. Ötən tur “Neftçi”yə məğlub olan Azər Bağırovun yetirmələri bu matça xüsusi diqqət yetirməli idi. Çünki “sarı-göylər”in turnir cədvəlində ən yaxın izləyicisi olan “Səbail” 3 xal qazanarsa, “Kəpəz”i sonuncu pilləyə yuvarlayacaqdı. Hər halda, “Səbail”in “Zirə” önündə minimal məğlubiyyəti “Kəpəz”in xeyrinə işlədi. Bərabərlik hesabına xalını 11-ə çatdıran Gəncə təmsilçisi qış fasiləsində ciddi şəkildə güclənməlidi. Yoxsa sonra gec olacaq. “Sumqayıt”da isə fərqli əhval-ruhiyyə hökm sürürdü. Axı Vaqif Cavadovun komandası ötən tur “Qarabağ” önündə darmadağın olmuşdu. Mümkün qələbə “Sabah”la aradakı xal fərqini azaldacaqdı.

“Neftçi” çətin Tovuz səfərindən 1 xalla qayıtdı. Əslində bu nəticə tərəflərdən heç birini razı salmadı. Avrokuboklara vəsiqəyə iddialı “Turan Tovuz” son turlarda müntəzəm xal itirir. İli ilk “3-lük”də bitirən komanda indi “Zirə”nin isti nəfəsini kürəyində hiss edir. “Neftçi” haqda isə ümidverici nəsə demək çətindi. Görünən odu ki, Samir Abasov bu komandanı böhrandan çıxarmağı bacarmadı, heç bunun yolunu da bilmir.
Doğma meydanda “Zirə”yə uduzan “Səbail” sonuncu pillədən qurtulmağı bacarmadı. “Qartallar” qələbə hesabına “Turan Tovuz”a daha da yaxınlaşdı. “Qartallar” da ili major notda tamamlayır. “Səbail”in isə tətil ərəfəsində sensasiyaya gücü çatmadı.

Maraqlı qarşılaşmalardan biri də Şamaxıda keçirildi. “Şamaxı”nın “doğma divarlar” arasında “Sabah”a qalib gəlməsi Masazır təmsilçisi üçün fiasko idi. “Sabah”ın yeni baş məşqçisi Vasili Berezutskiyə ilk məğlubiyyəti Ayxan Abbasovun komandası yaşatdı. İkinci hissədə fərqi 2 topa çatdıran “şirlər” hesabı qorumağı bacardı. “Şamaxı” bu qələbə hesabına turnir cədvəlində “Neftçi”ni geridə qoydu, “Sumqayıt”a yaxınlaşdı. Ötən tur “Araz-Naxçıvan”ı sarsıdan “tələbələr” bu dəfə özü sarsıldı.

Turun və ilin son oyunu Tofiq Bəhramov adına Respublika stadionunda keçirildi. “Qarabağ” – “Araz-Naxçıvan” oyunu da maraqla gözlənilirdi. “Köhlən atlar” ilk dövrədə bu rəqibi darmadağın etmişdi (1:4).Turun mərkəzi matçında “Qarabağ” “Araz-Naxçıvan”ın qapısından 2 cavabsız qol keçirməyi bacardı. Düzdü, Felipe Santos da “Qarabağ”ın qapısına yol tapdı, ancaq qol qeydə alınmadı.

Kəsəsi, artıq indidən ən yaxın izləyicisindən 8 xal uzaqlaşan “Qarabağ”a mövsümün ikinci yarısında çatmaq çox çətin olacaq. Daha doğrusu, indidən çempionat iştirakçılarını “Qarabağ” və başqaları kimi iki qrupa ayırmağa məcburuq.

Misli premyer-liqası
2-ci dövrə, 18-ci tur
20 dekabr
Kəpəz - Sumqayıt 0:0
21 dekabr
Turan Tovuz – Neftçi 1:1
Səbail – Zirə 0:1
22 dekabr
Şamaxı – Sabah 3:1
Qarabağ - Araz-Naxçıvan 2:0

1. Qarabağ 18 15 2 1 47-7 47
2. Araz-Naxçıvan 18 12 3 3 21-13 39
3. Turan Tovuz 18 8 8 2 24-15 32
4. Zirə 18 9 3 6 28-16 30
5. Sabah 18 6 8 4 27-24 26
6. Sumqayıt 18 6 2 10 15-26 20
7. Şamaxı 18 4 5 9 16-23 17
8. Neftçi 18 3 8 7 16-27 17
9. Kəpəz 18 3 2 13 12-41 11
10. Səbail 18 2 4 12 16-30 9

Bombardirlər: Coy-Lens Mikels (Sabah), Felipe Santos (Araz-Naxçıvan) – 8, Davit Volkov (Zirə), Leandro Andrade (Qarabağ) – 7.

Növbəti turun oyunları yanvarın 17-19-da keçiriləcək: “Şamaxı” – “Qarabağ”, “Zirə” – “Araz-Naxçıvan”, “Neftçi” – “Sabah”, “Sumqayıt” – “Səbail”, “Kəpəz” – “Turan Tovuz”.

ƏSƏD SEYİDOV