Ötən gün keçirilən 4 oyunla premyer-liqada 35-ci tura yekun vuruldu. Hesabat turunda bir-birindən maraqlı, gərgin oyunlara şahidlik etdik.

Bazar günü Qəbələdə keçirilən qarşılaşmada turnir hədəfi olmayan iki komanda – “Kəpəz” və “Neftçi” üz-üzə gəldi. Oyunun favoriti bakılılar olsa da, ölkənin ikinci ən böyük şəhərinin təmsilçisi ilk hissədə layiqincə mübarizə aparıb fasiləyə üstün yollandı. Amma “ağ-qaralar” ikinci yarıda toparlanmağı bacardı. “Bürünc”ü təmin edən “Neftçi” “sarı-göylər”i 3 dəfə meydanın mərkəzinə dəvət etməklə ayyarımlıq qələbəsizlikdən sonra hesabına 3 xal yazdı.

Çempionluğu təmin edən “Qarabağ” “Sumqayıt”ı qonaq etdi. Elitadan düşmək təhlükəsi ilə üz-üzə qalan “kimyaçılar” bəlkə də turun sürprizinə imza atmaqla çoxlarını təəccübləndirdi. Samir Abasovun komandası 10 qat ölkə çempionu üzərində qələbə qazandı ki, bu 3 xal “gəncik şəhəri” təmsilçisini elitada saxladı. Onu da qeyd etmək lazımdı ki, çempionatın ən sərrast futbolçusu Ramil Şeydayev 81-ci dəqiqədə penaltini boşa verməklə mövsümdə 23-cü qolunu vurmaq şansını qaçırdı.

“Şamaxı”nın qonağı olan “Qəbələ” dünən qələbə qazanacağı halda avrokuboklara vəsiqəni təmin edə bilərdi. Ancaq Elmar Baxşıyevin yetirmələri elitada qalmaq uğrunda mübarizə aparan rəqibinin müqavilmətini qıra bilmədi. Bu səbəbdən “Zirə” hələ də qitəmiqyaslı turnirə yollanacaq qatara bilet əldə etmək şansını saxlayır. Rəşad Sadıqovun yetirmələri isə “Sabah”a məğlub olmadı. Oyun başladığı kimi də başa çatdı. “Şamaxı”ya gəlincə, “şirlər”i son turda “Səbail” ilə ölüm-qalım matçı gözləyir. Tovuzda yerli komanda ilə heç-heçə edən Şahin Diniyevin çalışdırdığı kollektivi son turda bərabərlik də qane edir.

Misli premyer-liqası
4-cü dövrə, 35-ci tur
21 may
Kəpəz – Neftçi 1:3
22 may
Turan Tovuz – Səbail 2:2
Qarabağ – Sumqayıt 1:2
Şamaxı – Qəbələ 0:0
Sabah – Zirə 0:0

1. Qarabağ 35 27 6 2 88-24 87
2. Sabah 35 25 6 4 75-23 81
3. Neftçi 35 19 8 8 62-38 65
4. Qəbələ 35 13 10 12 46-46 49
5. Zirə 35 12 11 12 42-46 47
6. Turan Tovuz 35 10 9 16 35-46 39
7. Sumqayıt 35 8 7 20 26-67 31
8. Kəpəz 35 6 12 17 33-61 30
9. Səbail 35 6 8 21 31-62 26
10. Şamaxı 35 4 13 18 26-51 25
Bombardirlər: Ramil Şeydayev (Qarabağ) – 22, Musa Qurbanlı (Qarabağ) – 20, Coy-Lens Mikels (Sabah) – 17, Emin Mahmudov (Neftçi), Aleksey Kaşuk (Sabah) – 16.

Sonuncu turun oyunları mayın 28-də keçiriləcək: Sumqayıt – Zirə, Neftçi – Sabah, Qəbələ - Kəpəz, Səbail – Şamaxı, Qarabağ – Turan Tovuz.

RƏŞAD